С.Эрдэнэ: Ахмад настны тэтгэврийн доод хэмжээг 500 мянга болгоно

УИХ-ын гишүүн, Ардчилсан намын дарга С.Эрдэнэ:

-Хуулийн төслийг өргөн барьсан. Сөрөг хүчний намынх гэдэг юм уу хэлэлцэхгүй байна. СӨХ-ийн хууль өргөн барьсан бас л хэлэлцэхгүй байна. Энэ мэтээр улс төрийн башир арга хэрэглэж өргөн барьж байгаа хуулиудыг унагаж байна.

Энэ хуулийн гол утга нь бүрэн тэтгэврийн хэмжээ нь 500 мянгаас доошгүй байх, хувь тэнцүүлсэн тэтгэврийг 420 мянгаас доошгүй байх саналыг өргөн барьж байгаа юм. Өөрөөр хэлбэл тэтгэврийн доод хэмжээг тогтоож өгч байгаа юм.

Юмны үнэ, валютын ханш өдрөөс өдөрт өсөж байгаа нөхцөлд нийгмийн хамгааллын бодлого, ахмад настны тэтгэвэр тэтгэмж дээр тодорхой арга хэмжээ авахгүй бол энэ бүх хүнд хэцүүд хамгийн түрүүнд өртөх нь ахмад настнууд болоод байна. Тийм учраас энэ хуулийн төслийг санаачилж, өргөн барьж байгаа юм.

Үүнтэй холбоотой эдийн засгийн судалгааг хийсэн. Нэг их айхтар том тоо гарахгүй. Хуулийг батлагдсан өдрөөс нь хүчин төгөлдөр болж хэрэгжихээр тусгагдсан байгаа. Ингэснээр хувь тэнцүүлсэн тэтгэврийн хэмжээ нь 420 мянгаас доош байгаа иргэд, бүрэн тэтгэвэр нь 500 мянгаас доош байгаа иргэдийн талаар нарийвчилсан судалгаа авч байна. Бид нар санал авах гээд ЗГ-т саналаа хүргүүлсэн. ЗГ нь УИХ-ын гишүүнээс өргөн барьж байгаа хуулийн төсөл дээр судалгаа хийх үүрэгтэй. Тэгээд Засгийн газар 30 хоногийн дотор хариу өгөх ёстой. Би өнгөрсөн долоо хоногт Хамтын тэтгэврийн тухай хууль, Тэтгэврийн доод хэмжээг нэмэгдүүлэх тухай хуулийн төслийг өргөн барьсан. Хэрэв хариу ирүүлээгүй тохиолдолд шууд өргөн барих нөхцөл байдал үүснэ гэсэн үг.