С.Чинзориг: Багш нарт үндсэн цалин, урамшууллыг олгоно

Шинэ титэм вирусээс урьдчилан сэргийлэх зорилгоор ерөнхий боловсролын сургууль, цэцэрлэг болон их, дээд сургууль, МСҮТ-үүдийн үйл ажиллагааг зогсоох шийдвэрийг Засгийн газраас гаргаад байгаа.  МСҮТ-үүдийн үйл ажиллагааг зогсоосонтой холбогдуулан суралцагчдын цалинг олгох эсэх талаар ХНХ-ийн сайд С.Чинзориг мэдээлэл өглөө.

-ЗГ-ын ээлжит бус хуралдаанаар 5 хүртэлх насны эцэг, эхчүүд чөлөө авсан бол цалинтай чөлөө өгч байхыг аж ахуйн нэгжүүдэд уриалсан.

-Мэргэжлийн сургалтын төвүүдийн хүүхдүүд стипенди гэж авдаг. Түүнийг нь энэ хөл хорионы хугацаанд олгох уу?

-Мэргэжлийн болон сургалтын төвүүдийн үйл ажиллагааг зогсоосон. Ямар ч байсан багш нарт үндсэн цалин, урамшууллыг олгож таарна. Онцгой нөхцөлд цалин хөлсийг олгоно гэсэн урамшууллыг олгоно. Хүүхдийн стипендийн хувьд нэг сарын хугацаанд тэтгэлэг олгохгүй гэсэн байр суурьтай байна.

-5 хоногоос дээш хүүхдээ харвал цалинтай чөлөө олгоно гэдэг чинь худлаа мэдээлэл юм байна?

-Яг Засгийн газрын тогтоол гараагүй. Би өөрөө ЗГ-ын хуралдаанд оролцож амжаагүй. Тэмдэглэлд нь тийм асуудлыг оруулсан тухай байсан. Яг нарийн мэдээлэл өөрөө авч амжаагүй байна.

-Төрийн албан хаагчдын хувьд?

-Хүүхдээ харах цалинтай чөлөө олгож байсан практик бий. Жилийн өмнө билүү бас ханиад томуу гарахад ЗГ-аас ААН, байгууллагуудад уриалаад, зөвлөөд өөрсдийн боломжоороо эмнэлгийн акттай, чөлөөтэй тохиолдолд 5 хоногийн цалинтай чөлөө олгож байгаач гэсэн шийдвэр гараад хэрэгжүүлж байсан практик бий.

-Хувийн хэвшлүүдэд?

-Хувийн хэвшлүүдэд шууд тогтоолоор заачхаж болохгүй тул уриалах, зөвлөх л боломжтой.