ЭЦГ: zarig.mn сайтруу БНХАУ-ын хоёр компанийн айпи хаягнаас халдлага үйлджээ

2019 оны есдүгээр сарын 16-нд zarig.mn сайт нь цахим халдлагад өртөж, үйл ажиллагаа нь таван цаг гаруй хугацаанд зогссон юм. Тус сайтын зүгээс Эрүүгийн цагдаагийн газарт халдлагад өртсөн талаар гомдлыг гаргасан билээ. Энэ дагуу ЭЦГ-аас мөрдлөгө явуулж халдлага өртсөн айпи хаягуудыг тогтоожээ. Тодруулбал 106.13.22.75, 139.217.134.139 хаягуудаас нэгэн зэрэг сүлжээг унагах зорилготой маш олон халдлага үйлджээ.

Тус айпи хаягууд нь БНХАУ-д байрлах интернетийн үйлчилгээ явуулдаг “China Beijing Baidu Netcom Science and technology Co.Ltd” , China Shanghai Mikrosoft (China) Co.Ltd компаниудын бүртгэл дээр байдаг нь тогтоогджээ. Тус халдлагыг DOS халдлага гэх бөгөөд хэвийн үйл ажиллагааг алдагдуулах, үйл ажиллагааг зогсоох, санаатай хакерын халдлагыг хэлдэг аж. Ийм төрлийн цахим халдлагыг ихэвчлэн төлбөртэйгээр санаатайгаар үйлдэгддэг болохыг цагдаагийн байгууллагаас хэлж байна. Тиймээс хэвлэл мэдээллийн хэрэгслүүд цахим халдлагаас сэргийлэхийн тулд “firewall” буюу галт ханаа сайжруулах, вирусны эсрэг програмыг шинэчлэхийг сэрэмжлүүлж байна. Зариг.сайтруу халдлага үйлдсэн тус хэргийг Эрүүгийн цагдаагийн албаны Кибер гэмт хэрэгтэй тэмцэх хэлтэс шалгаж байгаа юм.