Д.Эрдэнэбат : Казиногоор ороод гарсан нь үнэн, орсон шалтгаанаа зөвтгөх шалтгаан байхгүй

Австралийн Холбооны Улсад болсон Ази, Номхон далайн орнуудын парламентын 28 дугаар чуулганд манай улсаас УИХ-ын дарга Г.Занданшатар,  УИХ дахь МАН-ын бүлгийн дарга Д.Тогтохсүрэн, УИХ-ын гишүүн Д.Лүндээжанцан, Ж.Мөнхбат, УИХ дахь АН-ын бүлгийн дарга Д.Эрдэнэбат нарын төлөөлөгчид оролцоод, өчигдөр эх орондоо ирсэн байна.  

Харин айлчлалын багийн гишүүд казино тоглож байгаа нь гэрэл зургаар баталгаажин манай редакцид ирснийг бид мэдээлсэн. Казино тоглож байгааг баталгаажуулсан  тус гэрэл зурагт УИХ дахь МАН-ын бүлгийн дарга Д.Тогтохсүрэн, Ардчилсан намын зөвлөлийн дарга Д.Эрдэнэбат, Австрали улс дахь элчин сайд Б.Чулуунхүү нар байна.

Энэ талаар УИХ дахь АН-ын зөвлөлийн дарга, УИХ-ын гишүүн Д.Эрдэнэбат “Хөтөлбөрийн хүрээнд бидэнд нэг өдөр чөлөөт цаг гарсан. Энэ өдөр Сиднейгийн түүх дурсгалын газар, аялал жуулчлалын төвөөр орох хуваарьтай байсан. Бид аялал жуулчлалын том төв болох “The Star Sidney”-гээр орсон. Үүгээр явж байхдаа казиногоор ороод гарсан нь үнэн. Харийн оронд бид нэг л монголчууд түүнээс аль нэг намын ч юм уу ялгаа байдаггүй. Чөлөөт цагаа нэг сайхан чөлөөтэй өнгөрөөе гээд бодол хүн болгонд байдаг. Энэ тугаараа тэнд ороод гарсан нь үнэн. Орсон шалтгаанаа зөвтгөх, хамгаалах үндэслэл байхгүй. Ирснээсээ хойш энэ талаар ямар нэгэн тайлбар хийж, хүн амьтантай яриагүй. Ганц энэ шуугианыг далимдуулаад улстөржөөд, нэгнээ доромжлоод, гүтгээд, нэр хүндийг нь унагаад, иргэдээ хуваах ёсгүй гэж бодож байна. Гэхдээ бид мөрийтэй тоглоогүй. Миний зураг гарсан байналээ. Хүмүүс мөн үү, биш үү гээд лавлаад байна. Би Д.Тогтохсүрэн гишүүний хажууд зогсож байсан нь би мөн. Анх тийшээ орохдоо хөтөлбөрийн дагуу үзэж сонирхсон. Орж, гарахад ямар нэгэн биеийн байцаалт бичиг баримт шаарддаггүй. Ороод сонирхоод гаръя гэж л орсон.  Өндөр хөгжсөн орнуудад казино бол аялал жуулчлалын байдаг л зүйл гэж ойлгож байгаа. Мөрийтэй тоглох гэсэн хүн болгон тийшээ ордог гэж бодохгүй байна. Тэнд ямар ч гишүүн тоглоогүй. Дөрвүүлээ ороод цаг гаруй болоод гарсан. Бидний дунд мөрийтэй тоглох мөнгөтэй хүн ч байгаагүй” гэв.