13 настай хүү: Ах согтуудаа хөөгөөд байдаг болохоор хулгай хийдэг болсон

НЦГ-ын Мөрдөн шалгах газрын Хулгайлах гэмт хэрэгтэй тэмцэх хэлтсийн алба хаагчид 2020 оны нэгдүгээр сарын 14-ний өдөр нийслэлийн орон байруудаар хулгайн гэмт хэрэг үйлддэг бүлэг этгээдийг баривчилж саатуулсан байна. Тус этгээдүүдийн дунд насанд хүрээгүй хүүхэд оролцсон болохыг мөрдөн байцаагчид урьдчилсан байдлаар тогтоож, шалгалтын ажиллагааг үргэлжлүүлж байгаа юм. Тухайлбал, 13 настай М нь бусадтайгаа нийлэн 2019 оноос гэмт хэрэг үйлдэж эхэлжээ. Ингэхдээ хичээлээ тарах цагаар эсвэл хичээлээ тасалж хулгай хийдэг болох нь тогтоогдсон аж.

Тус бүлэг этгээд нь өмнө хулгайн хэрэгт удаа дараа холбогдож, шалгагдаж байсан бөгөөд одоогоор орон байрны хулгайн нийтдээ 60 үйлдэл хийсэн байна. Хэрэв насанд хүрээгүй хүүхэд сургууль, хичээлийн цагаар гэмт хэрэг, зөрчилд холбогдвол эцэг эх буюу асран хамгаалагчдад хариуцлага тооцох хуулийн заалттай.

Энэ талаар ЦЕГ-ын хэвлэл мэдээллийн төвийн мэргэжилтэн, цагдаагийн ахмад М.Мөнхшүр "Сурагчдын амралт үргэлжилж буй энэ цаг хугацаанд ЕБС-ийн сурагчид гэмт хэрэг зөрчилд холбогдохгүй байхад эцэг, эхчүүд анхаарал тавих ёстой. Харин сургуулийн амралт дуусч, хичээл орж буй үед сурган хүмүүжүүлэгч хариуцлага хүлээнэ гэсэн хуулийн заалтууд бий. Энэхүү гэмт хэргийг үйлдсэн гэх 13 настай М гэгч хүү хичээлээ тарсан цаг, эсвэл хичээлээ санаатайгаар тасалж гэмт хэрэгтнүүдтэй нийлж хэрэг, зөрчлийг үйлддэг болохоо хэлсэн" гэлээ.