Анхаар: Хүүхэд гэмт хэргийн хохирогч болж байгаа хэргүүдийн 87 хувийг насанд хүрэгсэд үйлдэж байна

Хүүхэд гэмт хэргийн хохирогч болж байгаа хэргүүдийн 87 хувийг үйлдэгчид нь насанд хүрэгсэд байна. Уг нь тэд хүүхдийг гэмт хэргээс хамгаалах үүрэгтэй байтал судалгааны дүн эсрэг тоог харуулж байна. Үүнд гэр бүлийн хүчирхийлэл, ахуйн хүрээнд үйлдэгдсэн гэмт хэргүүд, /түлэгдэх, усанд живэх, зам тээврийн осол, хөлдөх/ багтаж байгаа юм. Ахуйн хүрээнд үйлдэгдсэн гэмт хэргийн улмаас 12 хүүхэд амь насаа алдсан байна. Жишээ дурдахад, төрсөн эцэг эх нь хүүхдээ үл хайхрах хүчирхийлэлд оруулж, 24 цагийн турш гэрт нь ганцааранг нь цоожлон үлдээснээс хүүхдийн гар, хөл хөлдөх, нэг настай хүүхэд усны сав руу унаж, амь насаа алдах, гэр бүлийн хүчирхийллийн улмаас бага насны хүүхэд амиа алдах, бэлгийн болон бие махбодийн хүчирхийлэлд өртөх зэрэг хэргүүд бүртгэгджээ. ЦЕГ-аас 2019 оны гэмт хэргийн гаралтын мэдээнд гэмт хэрэг өмнөх оноос 20 хувиар буурсан дүнг үзүүлсэн. Гэтэл ганцхан гэр бүлийн хүчирхийллийн хэрэг өссөн үзүүлэлтийг харуулж байна. Энэ төрлийн гэмт хэргийн хохирогчид нь ихэвчлэн өөрийгөө хамгаалах чадваргүй хүүхдүүд байгаа тул насанд хүрэгсэд бага насны хүүхдэд тавих хараа хяналтаа сайжруулах, анхаарал болгоомжоо нэмэгдүүлэх шаардлагатай байгаа юм.