Эх орноосоо урваагүй гэдгээ цамцан дээрээ цусаараа бичсэн Өлзийбүрэнгийн Пунцаг

"Эрүү" хэмээх хочтой Өлзийбүрэнгийн Пунцаг "хувьсгалын эсэргүү" хэмээн баривчлагдан Дотоод Явдлын яамны шоронд тамлагдаж байхдаа, эх орноосоо урваагүй гэдгээ батлан цамцныхаа арыг тасдан өөрийнхөө цусаар УБХ-ын Тэргүүлэгчдийн дарга Д.Догсом, БНМАУ-ын Ерөнхий сайд А.Амар, Дотоод Явдлын Яамны сайд, маршал Х.Чойбалсан нарт бичсэн үг. Цамцан дээр цусаараа монгол бичгээр бичсэн үг нь: "УДИРДАГЧ ДОГСОМ, АМАР, МАРШАЛ НАРТ. ҮНЭНЧ ЯВСАН БА ҮНЭНЭЭ ИЛЭРХИЙЛСЭНЭЭ ЦУСААРАА ТАНГАРАГЛАЯ, МОНГОЛ УЛС ХЭЗЭЭД МАНДТУГАЙ! ПУНЦАГ. 27.11.28 ". 27.11.28 гэсэн нь Монгол улсын 27 оны 11 сарын 28 гэсэн үг. Монгол Улсын 27 он буюу аргын буюу нийтийн тооллын 1937 оны 11 сарын 28. Өдгөө ТЕГ-ын Тусгай Архивт хадгалагдаж буй.

1893 онд төрсөн Ховд нутгийн хүү Ардын Хатанбаатар С.Магсаржавын цэрэгт баруун хязгаарыг чөлөөлөх тулалдаанд оролцож явсан. Цэргийн ерөнхий сургууль, цэргийн анги нэгтгэлүүдэд дарга, Цэргийн прокурор, Хоршоодын ерөнхий хорооны дарга, Дотоод яамны тусгай хэлтсийн дарга, Аж үйлдвэрийн комбинатын даргаар ажиллаж байгаад хэлмэгдсэн. Түүнийг Хэнтий, Дорнод хязгаарын цэргийг Японы талд урвуулах, Аж үйлдвэрийн комбинатын 6000 төгрөгийг үл бүтэх этгээдүүдэд ашиглуулсан гэсэн ял тулгаж, эрүүдэн шүүж байгаад цаазлан хороожээ. Хуулийн дээд хэмжээ оноосон эл хэрэг нь хилс байсныг 1962 онд цагаатгаж, МАХН-ын гишүүнчлэлийг нь 1925 онд элссэнээр сэргээсэн.

Нийтлэгч: Согоо  N_sogoo.@