Х.Оргил-Эрдэнийн цагдан хорионы хурлын үеэр түүний өмгөөлөгч шүүгчээс татгалзжээ

Өчигдөр /2019.12.30/ орой ЗТХЯ-ны Авто замын бодлогын хэрэгжилтийг зохицуулах газрын Замын ашиглалт, засварын хэлтсийн дарга Х.Оргил-Эрдэнэ хятад иргэнээс авлига авч байгаад АТГ-ын мөрдөгчдөд үйлдэл дээрээ баригдсан талаар бид мэдээлсэн. Тэгвэл Х.Оргил-Эрдэнэ нь тухайн иргэнтэй гадуур уулзаж, 20 мянга орчим юанийн авлига авсан гэх эх сурвалжийн мэдээлэл байна.

Сүхбаатар дүүргийн Эрүүгийн хэргийн анхан шатны шүүхийн шүүхэд Зам тээврийн яамны бодлого зохицуулалтын хэлтсийн дарга Х.Оргил-Эрдэнийг цагдан хорих таслан сэргийлэх арга хэмжээ авах тухай санал АТГ-с /2019.12.31/-ний өдөр ирж шүүх хурлын үеэр түүний өмгөөлөгч шүүгчээс татгалзсан аж.  Уг татгалзлыг үндэстэй эсэх асуудлыг тухайн шүүхийн ерөнхий шүүгч шийднэ. Одоогоор хариу гараагүй байна.

Х.Оргил-Эрдэнэ гэж хэн бэ?

Халтарын Оргил-Эрдэнэ нь сонгуулийн дараа буюу 2016 оны наймдугаар сарын 29-ны өдөр ЗТХЯ-ны хэлтсийн даргаар томилогдсон. Түүний ахалдаг Замын ашиглалт, засварын хэлтэс нь Авто замын бодлогын хэрэгжилтийг зохицуулах газрын дор харьяалагддаг. Үүнийг тодруулахын учир нь Авто замын бодлогын хэрэгжилтийг зохицуулах газрын даргаар ажиллаж байсан Д.Доржхандыг мөн л АТГ-аас авлигын хэргээр баривчлан шалгаж байгаа. Ийнхүү газрынх нь дарга Д.Доржханд хуулийн байгууллагаар шалгагдаж, ажлаа хийх боломжгүй болсноор түүний үүрэг гүйцэтгэгчээр Х.Оргил-Эрдэнэ ажиллаж эхэлсэн байна. Ингэхдээ газрынхаа даргын авлигын хэргийг ч мөн үргэлжлүүлэн гүйцэтгэсэн бололтой.

Х.Оргил-Эрдэнийн жилийн нийт орлого 17 сая төгрөг, гэр бүлийнх нь орлого 14 сая төгрөг, нийтийн орон сууцанд амьдардаг, тоёота хайландер болон суудлын жижиг автомашинтай, тэдгээрийгээ 71 сая төгрөгөөр үнэлсэн, 170 ямаа, 150 хонь, 30 үхэр, 30 адуу нь 61 сая төгрөгийн үнэлгээтэй, 20 сая төгрөгийн үнэ бүхий үнэт эдлэлтэй, зургаан сая төгрөгийн хадгаламжтай гэсэн хөрөнгө орлогын мэдүүлгийг АТГ-т мэдүүлжээ.