Шуурхай: Франц дахь ЭСЯ-нд АТГ-ын мөрдөгчид нэгжлэг хийж байна

Польшийн цагдаагийн газраас эрэн сурвалжлагдаж буй 69 иргэн байгаа мэдээлэл ил болсон. Тэдний дунд Франц Улсад суугаа элчин сайд А.Баттөрийн эхнэр Ц.Баярмаа, зөвлөх М.Батсайхан нар багтсан. Тэгвэл яг одоо Франц дахь Элчин сайдын яамны байранд АТГ-ын мөрдөгчид үзлэг, нэгжлэг хийж байгаа аж. Ц.Баярмаа, М.Батсайхан нарын эрэн сурвалжлагдаж байгаа шалтгаан нь Польш Улсын хууль тогтоомжийг зөрчсөн, тамхины хууль бус наймаанд оролцсон, онцгой албан татвартай бараа бүтээгдэхүүнийг их хэмжээгээр хууль бусаар нэвтрүүлсэн гэдэг үндэслэлээр эрэн сурвалжилж байгаа юм. Энэ асуудал хөндөгдөх үед зөвлөх М.Батсайхан ээлжийн амралтаа авсан байсан бөгөөд ажлаа хэвийн үргэлжлүүлэн хийж байгаа аж. Хэрэв түдгэлзсэн бол М.Батсайхан өөрийн “хувийн чармайлт”-аар ажлаа хийж байгаа эсвэл Д.Даваасүрэн дарга худлаа ярьсан болж таарна. Учир нь Төрийн нарийн бичгийн дарга Д.Даваасүрэн Аюулгүй байдал, гадаад бодлогын байнгын хорооны хуралдаан дээр “хууль бус наймаанд нэр холбогдосон дипломатуудад хариуцлага тооцон ажлаас халж байгаа” гэсэн мэдэгдлийг УИХ-ын гишүүд, ард иргэдэд хэлсэн билээ. Тэрбээр М.Батсайханы найз учир найзыгаа хаацайлан авч үлдсэн байж болзошгүй хардлага байна. М.Батсайханыг Францын томоохон хотуудад хулгай хийдэг Монгол иргэдтэй холбоотой байдаг, хамтран ажилладаг тухай мэдээлэл мөн байдаг. Тэрээр Франц Улсад элчин сайд байхдаа хулгайн барааг борлуулахад нь тусалдаг, уг тусламжийн хариуд шан харамж авдаг тухай мэдээлэл байгаагаас гадна ЭСЯ-ны хуурамч тодорхойлолтыг /Монгол Улсын иргэн биш гэж тодорхойлсон/ Францын цагдаад баригдсан хулгайч нарт зарж байсныг хүмүүс гэрчилдэг байна. Тэрээр уг тодорхойлолтыг 1000-1500 еврогийн ханшаар худалддаг ба одоог хүртэл уг хууль бус ажиллагааг хэрэгжүүлж байгаа гэх мэдээлэл байна.