Нүүрсний хэрэглээнд гэнэтийн шалгалт хийжээ

Баянзүрх дүүргийн прокурорын газрын прокурорууд болон дүүрэг дэх Цагдаагийн гуравдугаар хэлтсийн хэсгийн байцаагчдын хамтарсан 4 ажлын хэсэг энэ оны 12 дугаар сарын 10-ны өдрийн 18-аас 22 цагийн хооронд дүүргийнхээ 8-12, 7, 20, 28 дугаар хороодын нутаг дэвсгэрт түүхий нүүрсээр галладаг 27 уурын зуухны үйл ажиллагааг гэнэтийн байдлаар шалгажээ.

Шалгалтаар дээрх хороодод түүхий нүүрс түлж буй айл байгаа эсэх, гэрээний дагуу уурын зуухнуудын яндангийн хэсэгт утаа шүүгч суурилуулсан эсэх, нүүрс алдагдах, зарж борлуулахаас урьдчилан сэргийлэх ажил, арга хэмжээг авч хэрэгжүүлсэн эсэхийг газар дээр нь үзэж, танилцсан байна.

Агаарын бохирдлыг бууруулах, иргэдийн эрүүл аюулгүй орчинд амьдрах нөхцөлийг бүрдүүлэхэд чиглэсэн тус шалгалтаар ил задгай нүүрсээ байлгадаг, харуул хамгаалалт муу, тоног төхөөрөмжид шүүлтүүр суулгасан эсэх нь тодорхойгүй зэрэг хэд хэдэн зөрчил илэрчээ. Иймд шалгалтын ажлын хэсгээс зөрчил илэрсэн газруудад тодорхой заавар, зөвлөмжийг өгч, зөрчлийг арилгах, дахин гаргахгүй байх талаар хугацаатай үүрэг өгч ажилласан байна.

Эх сурвалж: БАЯНЗҮРХ ДҮҮРГИЙН ПРОКУРОРЫН ГАЗАР