Үүрэглэсний улмаас осол гаргасан жолоочийг 50 мянган төгрөгөөр торгож, жолоо барих эрхийг зургаан сараар хасав

Сонгинохайрхан дүүргийн хх хороо сонсголонгийн гүүрнээс хойш явах замд буюу моносын уулзварт өчигдөр өглөө 08.00 цагт авто осол гарчээ. "Toyota landcruiser 200" маркийн авто машины жолооч нойрмоглон урсгал сөрж "Toyo- ta Prada" маркийн автомашинтай мөргөлдсөн аж. Урсгал сөрсөн жолооч ослын тухайд "урд шөнө нойргүй хоносон. Их ядарчихсан болохоор үүрэглэчихсэн" хэмээн тайлбар өгчээ. Уг ослын үеэр хүн бэртэж гэмтээгүй бөгөөд Сонгинохайрхан дүүргийн замын цагдаагийн хэлтэс хэрэг үүсгэн шалгаж байгаа аж. Зөрчлийн тухай хууль болон замын хөдөлгөөний дүрэмд хөдөлгөөний аюулгүй байдлыг хангаж чадахааргүй өвчтэй буюу ядарсан үедээ тээврийн хэрэгсэл жолоодохыг хориглосон заалтууд байдаг. Тодруулбал, замын хөдөлгөөнд урсгал сөрж орсон дээрх тохиолдолд зөрчлийн тухай хуулийн 14.7-д заасны дагуу 50 нэгж буюу 50 мянган төгрөгөөр торгож, жолоо барих эрхийг зургаан сарын хугацаатай хасахаар заажээ. Тиймээс иргэдийг замын хөдөлгөөний дүрмээ биелүүлж, хэт ядарсан үедээ жолоо барихгүй байхыг тээврийн цагдаагийн албанаас анхаарууллаа.