800 иргэнээс орон сууцны урьдчилгаа авч, хохироосон Д.Гүрсоронзыг яллагдагчаар татжээ

"Орон сууцны урьдчилгаа төлбөр 10-30 хувь буюу маш бага хэмжээгээр төлж, захиалгаа өгөөд, үлдэгдэл төлбөрөө уян хатан нөхцөлтэйгээр төлөх боломжтой" хэмээн сурталчилж, иргэдээс төлбөр авсан ч орон сууц нь баригдаагүй, иргэдийн мөнгийг буцаан олгоогүй "Нарны хүү, сарны охин" гэх компанийн талаар бид өмнө цуврал сурвалжилгуудыг бэлтгэн хүргэж байсан.

Тэгвэл тухайн компанид 800 орчим иргэн мөнгөө өгч, алдаад байгаа бөгөөд цагдаагийн байгууллагаас тус компанийн захирал Д.Гүрсоронзод Эрүүгийн хэрэг үүсгэн яллагдагчаар татжээ. Түүнийг өнгөрсөн есдүгээр сард баривчлан 30 хоногийн хугацаанд цагдан хорьж, шалгасан бөгөөд одоогоор батлан даалтад гаргаж, шалгалтын ажиллагаа үргэлжилж байгаа юм байна.

Шалгалтын хүрээнд 800 орчим иргэн хохирогчоор тогтоогдсон бөгөөд одоогийн байдлаар 200 гаруй иргэн мэдүүлэг тайлбараа өгөөд байгаа юм байна. Уг хэргийг Баянзүрх дүүргийн цагдаагийн гуравдугаар хэлтэст шалгаж байгаа бөгөөд энэ байгууллагад залилуулсан иргэд БЗД-ийн Цагдаагийн газрын мөрдөн байцаах тасагт хандаж, албан ёсоор гомдлоо гарган шалгуулахыг зөвлөж байна.