Б.Бат-эрдэнэ: Эмч нарын хандлага, харилцаа үнэхээр муу байна

УИХ-ын чуулганы хуралдаанаар Монгол Улсын Засгийн газар, Азийн хөгжлийн банк хамтран хэрэгжүүлэх "Эмзэг бүлгийн иргэдийн эрүүл мэндийн тусламж үйлчилгээний хүртээмжийг сайжруулах хөрөнгө оруулалтын хөтөлбөр"-ийн Санхүүжилтийн ерөнхий хэлэлцээрийг соёрхон батлах тухай хуулийн төслийг хэлэлцэж байна. Төслийг Эрүүл мэндийн сайд Д.Сарангэрэл танилцуулсан юм.

УИХ-ын гишүүн Б.Бат-Эрдэнэ: Миний сонгогдсон Бор өндөрийн тойрог эрүүл мэндийн салбарын хувьд туйлын хүнд. Парк шинэчлэлийн асуудлаар унаа хөсөг, эрүүл мэндийн байр оруулж ирэх шаардлагатай гэж яригдаж байсан ч чимээгүй л байна. Мөн 6, 7 мянган хүн амтай Өмнөдэлгэр суманд шинэ эрүүл мэндийн төв барих шаардлагатай байна.

Эмч нарын хандлага, харилцаа үнэхээр муу байна. Эмнэлэгт өвдөөд үзүүлж байгаа өвчтөнтэй нэг эмч ёс зүйгүй авирлаж, муухай харьцаж байгаад би харсан. Тухайн эмчийн нэр усыг аваад удирдлагад нь дамжуулсан ч, өнөөдөр хариуцлага тооцсон эсэх нь тодорхойгүй усанд хаясан чулуу шиг л замхарсан.

Эрүүл мэндийн сайд Д.Сарангэрэл: Б.Бат-Эрдэнэ гишүүн чухал асуудал хөндөж байна. Өнөөдөр эрүүл мэндийн салбарт тавин мянга гаруй хүн ажиллаж байна. Нэг үхрийн эвэр доргивол мянган үхрийн эвэр доргино гэдэг. Бүхэлдээ эрүүл мэндийн салбар хэрхэн зүтгэдгийг би сайн мэднэ. Гэхдээ асуудлууд бий. Боловсон хүчинд бодлогын түвшинд анхаарах нь зөв. Үүнийг боловсролын яам мэдэх асуудал. Ер нь боловсон хүчин сургалтын асуудлыг эрүүл мэндийн салбарт нь шилжүүлж байж үр дүн гаргана гэж бодож байна. 10 сая төгрөгийн мэс засал хийлгэлээ гэхэд 2.5 төгрөгийг өөрөө гаргаад үлдсэн мөнгийг эрүүл мэндийн сангаас гаргаж болно. Эрүүл мэндийн салбар сум дээр тогтвортой ажиллахад цалингийн нэмэгдэл өгөхөд хичээж байна. сувилагчийн цалин эмч нарын цалинг 20-47 хувиар нэмэгдүүлсэн. 2020 онд дахин нэмэгдүүлнэ.