Л.Оюун-Эрдэнэ: ТЕГ-ын дарга Д.Гэрэлийн асуудлыг Ерөнхий сайдыг ирэхээр ярьж магадгүй

Монгол Улсын Засгийн газрын тэргүүн, Ерөнхий сайд У.Хүрэлсүхийн ОХУ-д хийх төрийн айлчлал эхэлж, өнөөдөр хүлгийн жолоо залсан. Тухайн айлчлалын бүрэлдэхүүнд ТЕГ-ын дарга Д.Гэрэл багтсан байсан ч айлчлалын бүрэлдэхүүнээс хасч, Д.Гэрэл даргыг үлдээгээд явжээ.

Учир нь Тагнуулын ерөнхий газрын дарга Д.Гэрэл Засгийн газрын хяналт шалгалтаас алтны уурхайгаа нуун үлдсэн баримтыг бид өнгөрсөн долоо хоногт хүргэсэн билээ. Тодруулбал, Сэлэнгэ аймгийн Баянгол суманд байх алтны уурхай нь ТЕГ-ын дарга Д.Гэрэлийн хүү Г.Аранзалын эзэмшлийнх юм. Тухайн уурхайгаа харин "Пентатерра", "Тайхаржин транс" "Монгол алтай минт" компаниудаар дамжуулж "нуун" ажиллуулж байгаа юм. Энэ асуудлаар Ерөнхий сайд У.Хүрэлсүх "хариуцлага тооцох" албан бус мэдээлэл байна.

Тухайн алтны уурхайд өнгөрсөн тавдугаар сард осол гарч, эрдэнэт хүний амь нас эрсдчихээд байхад хэн нэгэн хариуцлага хүлээгээгүй өнөөдөрт хүрсэн билээ.

Тэгвэл энэ асуудлаар ЗГХЭГ-ын дарга Л.Оюун-Эрдэнээс тодруулахад "Яг энэ асуудлаар ярьсан зүйл одоогоор алга, Засгийн газрын хуралдаанаар Ерөнхий сайд ирсэний дараа энэ асуудлыг тодруулж ярих асуудал гарч магадгүй" гэлээ.