Бүх насаар нь хорих ял төлөвлөөд байгаа Б.Махбалд холбогдох шүүх хурал маргааш болно

Өнгөрсөн оны наймдугаар сарын 9-10-нд шилжих шөнө ЗТХЯ-ны гадаа тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнгийн амь насанд халдсан хэрэг гарсан. Уг хэрэгт холбогдуулан ЗТХЯ-ны газрын дарга Б.Махбалыг цагдан хорьж, шалгаж байгаа билээ.

Өнгөрсөн хугацаанд түүнд холбогдох хэргийн урьдчилсан хэлэлцүүлэг болохоор долоон удаа товлогдож, мөн тоогоор хойшлогдсон байдаг. Тэгвэл хойшлогдоод байгаа хэргийн урьдчилсан хэлэлцүүлгийн шүүх хурал маргааш болно.

Тодруулбал, Нийслэлийн Прокурорын газраас Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх хэсэгт зааснаар яллах дүгнэлт үйлдэж шүүхэд ирүүлснийг ийнхүү товлосон байна.

10.1 дүгээр зүйл.Хүнийг алах,

2.1.онц харгис хэрцгийгээр хэмээн заасан бөгөөд "Хүнийг онц харгис хэрцгийгээр алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ" хэмээн заасан байдаг.

Уг хуралд шүүгчээр Д.Ренченхорол, яллагдагчаар Б.Махбал, улсын яллагчаар Б.Баярхүү, талуудын өмгөөлөгчөөр Ш.Мягмарцэрэн, Д.Батбаяр, М.Алтанцэцэг, З.Хүрэлсүх, Ч.Отгонбаатар, Н.Баатардорж, хохирогчоор н.Өнөрцэцэг, Д.Доржсүрэн нар оролцох юм.