“Ц.САНДУЙН 60 ТЭРБУМЫН БИЧЛЭГ”-ИЙН ХЭРГИЙГ СОНГУУЛЬ ДӨХҮҮЛЖ ШИЙДЭХЭЭР БАЙНА

Өнгөрсөн оны зургадугаар сард болсон УИХ-ын сонгуулийн сурталчилгааны үеэр МАН-ын удирдлагууд болох М.Энхболд, Нийслэлийн МАН-ын дарга Ц.Сандуй, түүний туслах А.Ганбаатар нарын төрийн албан тушаалыг үнэлэн 60 тэрбум төгрөг босгох тухай ярилцаж байгаа дуу хоолойны бичлэг цацагдсан билээ.

Энэхүү бичлэгийг олон нийтэд цацаж, нэр хүндэд халдсан гэх үндэслэлээр НИТХ-ын Ц.Сандуйн хуулийн зөвлөх А.Ганбаатар, МАХН-ын Ерөнхий нарийн бичгийн дарга Э.Эрдэнэжамъянг шүүхэд өгсөн. Энэхүү хэргийг шүүх хурал өчигдөр 10 цагт Баянгол, Хан-Уул, Сонгинохайрхан дүүргийн иргэний хэргийн анхан шатны шүүхэд товлогдоод байсан ч шүүгчийн ар гэрт ажил явдал гарсан гэх шалтгаанаар дахин хойшилсон юм.

Энэхүү бичлэгийг АТГ-аас хянаж, эрүүгийн хэрэг үүсгэхээс татгалзсанаас гадна бичлэгийг цагдаагийн байгууллагаас эвлүүлэг хэмээн үзсэн байдаг. Гэвч шүүхэд нэхэмжлэл гаргасан А.Ганбаатар прокурорт өгсөн мэдүүлэгтээ өөрийнх нь дуу хоолой мөн хэмээн мэдүүлжээ. Түүгээр ч зогсохгүй тэрээр тухайн үеийн намын стратеги боловсруулж байсан нэр бүхий хүмүүс гар утсаараа дээрх бичлэгийг хийсэн гэх ба бичлэгээр сүрдүүлж 20 сая төгрөг нэхэмжилж, түүний нэхэмжилсэн мөнгийг дансанд нь хийсэн хэмээн мэдүүлсэн байдаг.

Харин МАХН-ын Ерөнхий нарийн бичгийн дарга Э.Эрдэнэжамъян "Ер нь бол шинжээч нарын дүгнэлтээр дуу хоолойны бичлэгийг эвлүүлэг гэж үзэлгүйгээр, дуу хоолойны бичлэг дээр дүрс тавьсныг нь эвлүүлэг гэж үзсэн болов уу. Прокурорын гаргасан дүгнэлтэд хүртэл шинжээч нь эвлүүлэг гэдгийг тогтоох боломжгүй байна. Энэ бол жинхэнэ бичлэг байна гэж дүгнэсэн дүгнэлт байдаг юм билээ. Өчигдөрийн шүүх хурал бол шүүгчийн ар гэрт гачигдал гарсан гээд хойшиллоо. Тодорхой цаг хугацаа зааж хэлээгүй байна. Удахгүй хэлнэ байх. Сонгуулийн сурталчилгаа дөхүүлж байж анхан шатны шүүх шийдвэр гаргах тактик байна уу гэж харж байгаа. Гэхдээ шүүхийн байгууллага, шүүгчид маань арай ч ийм тодорхой асуудал дээр улс төрийн даалгавраар ажиллахгүй байх" хэмээн өөрийн үзэл бодол байр сууриа илэрхийлсэн юм.