МАХН ГАНЦ Ч ҮГҮЙ БАЙХАД АН ДОЛУУЛАА ЕРӨНХИЙЛӨГЧ БОЛОХООР ЗҮТГЭВ

Намууд тавдугаар сарын 5-ны дотор Ерөнхийлөгчид нэр дэвшигчээ тодруулна. АН-ын лидерүүд бүгд Ерөнхийлөгч болох мөрөөдөлтэй. Тэд мөрөөдлөө ч нуулгүй нэр дэвшинэ гэдгээ мэдэгдээд дор бүрнээ өөрсдийгөө "реклам"-даад буй. АН-аас Хуульзүйн сайд асан Д.Дорлигжав, УИХ-ын гишүүн асан Р.Амаржаргал, Ерөнхий сайд асан Н.Алтанхуяг, УИХ-ын гишүүн Л.Болд, УИХ-ын гишүүн асан Х.Баттулга, Хотын дарга асан Э.Бат-Үүл, нийтлэлч Баабар нар Ерөнхийлөгчийн өмнөх сунгаанд оролцохоо намынхаа удирдлагад илэрхийлсэн.

АН-ын хүчтэй өрсөлдөгч МАН-ын хувьд Ерөнхийлөгчийн сонгуульд өрсөлдөх эрхийн төлөө УИХ-ын дарга М.Энхболд, УИХ-ын гишүүн Ө.Энхтүвшин нар өрсөлдөх бололтой.

Харин МАХН-аас одоогоор хэн Ерөнхийлөгчид "хүч үзэх" нь хараахан албан ёсоор тодроогүй байна. УИХ-ын гишүүн О.Баасанхүүгийн ярьж буйгаар бол Гадаад хэргийн сайд асан Л.Эрдэнэчулууны нэрийг дэвшүүлж магадгүй байгаа аж.