Б.НАРАНХҮҮ ГИШҮҮН ЧУУЛГАНЫ ХУРАЛДААНЫ 85 ХУВИЙГ НЬ ТАСАЛЖЭЭ

УИХ-ын намрын чуулганаар 85 хуулийн төсөл баталж, 190 гаруй хуульд нэмэлт, өөрчлөлт хийжээ. Гэвч намрын чуулган эхэлснээс хойш нэг зүйл засагдахгүй байсаар хаалтаа хийсэн юм. Тэр нь УИХ-ын гишүүдийн ирц билээ. УИХ-ын дэд дарга Ц.Нямдоржоор "Наранхүү гэж нөхөр байна. Хуралдаа яагаад суудаггүй юм бэ гэсэн чинь "Мэдэхгүй, ойлгохгүй юм чинь хайран сайхан цагаа тэнд үрээд яадаг юм" гээд телевизээр ярилцлага өгөөд сууж байна" хэмээн шүүмжлүүлж байсан УИХ-ын гишүүн Б.Наранхүү чуулганы хуралдааныг хамгийн их тасалдаг гишүүнээр тодорлоо.

Парламентын бүрэн эрхийн дөрвөн жилийн хугацаанд анхдугаар чуулган, ээлжит бус чуулганыг эс тооцвол УИХ албан ёсоор найман удаа хуралддаг. Харин Б.Наранхүү гишүүн 26 цагийн чуулганы хуралдаанд сууж, 74 цагийг нь тасалж, 21 цагийг нь гадаад томилолтоор аргалж, 32 цагийг нь орон нутагт өнгөрүүлжээ. Б.Наранхүү гишүүний хувьд энэ нь шинэ үзэгдэл биш. Өмнөх парламентад ч гэсэн хамгийн их хуралдаан тасалдаг гишүүнээр тодорч байсан билээ.

"Хааны алба халаатай, эзний алба ээлжтэй" учраас дундговьчууд ирэх сонгуулиар арай дөнгүүрхэн шиг буюу ядах нь аа юу яриад байгааг нь гадарлах гишүүнээ төрд илгээнэ биз. Эс бөгөөс "Мэдэхгүй, ойлгохгүй юм чинь..." чаддагаар нь хуралдаанаа тасална шүү дээ.