ВЕГАН ЭМЭГТЭЙ 16 МОЛТОГЧИН АВРААД 100 БҮЖИНГИЙН АМИНД ХҮРЧЭЭ

Амьтны гаралтай бүх л бүтээгдэхүүнийг хүнсэнд болон ахуйд хэрэглэхийн эсрэг тэмцдэг веганууд мах, сүү, арьс шир бэлтгэлийн фермерүүдийн эсрэг янз бүрийн тэмцэл явуулдаг. Хамгийн сүүлд гэхэд Испанид амьдардаг нэгэн веган эмэгтэй молтогчин туулайнуудыг аврах нэрийдлээр үржүүлгийн ферм рүү дайралт хийсэн нь 100 орчим бүжингийн үхэлд хүргэсэн тухай "New York Post" сонин дамжуулж байна.

Mythical Mia нэрээр олон нийтийн сүлжээнд хийсэн үйлдлийнхээ бичлэгийг байршуулсан эмэгтэй Осонья хотын ойролцоо молтогчин үржүүлгийн ферм рүү сэм нэвтэрсэн байна. Тэрээр боломжийн хэрээр олон молтогчин фермээс авч гарвал нядалгаанд оруулахаас аварч "баатар" болно гэж тооцсон байж.

Гэтэл түүний хийсэн дайралтын дараагаар ойролцоох мал эмнэлэгт янз бүрээр гэмтэж бэртсэн 90 бүжинг зовоохгүйн тулд хүчтэй тариа хийж үүр унтуулах хэрэг гарсан тухай мэдээлжээ. Хулгайлсан молтогчин туулайнууд нь бүгд хээлтэй эмэгчин байсан тул ийм олон бүжин дутуу төрж унтуулахаас өөр аргагүй болсон аж. Харин хэргийн эзэн аврагч нь молтогчин туулайнуудыг аврах гэхэд нь фермийн эзэд түүний араас буудсан гэж олон нийтийн сүлжээнд пост үлдээсэн байна.