​ХОЙД СОЛОНГОС НЬ УЛС БАЙГУУЛАГДСАН ӨДРӨӨРӨӨ ЦЭРГИЙН ЖАГСААЛ ХИЙСЭНГҮЙ

Хойд Солонгос нь улс байгуулагдсан 71 жилийн ойн баяраа тун даруухан тэмдэглэсэн явдал олон улсын анхаарлыг ихэд татав. Уламжлал ёсоор энэ өдөр хамгийн сүүлийн үеийн зэвсэг техникээ харуулж, "импералистуудад бууж өгөхгүй, гороо тат" гэсэн уриатай цэргийн нүсэр жагсаал болдог. Гэвч энэ удаад улс байгуулагдсан өдрийг "үндэсний ёслол" гэхээс илүүтэйгээр "гэр бүлийн баяр" гэсэн хэмжээтэй тэмдэглэсэн тухай сэтгүүлчид мэдээлсэн байна. Жагсаал хийгээгүй шалтгаан нь албан ёсоор бол тэмдэглэлт жил тараагүй гэж байгаа ч үнэн хэрэг дээрээ Ким Жон Ун аль болох богино хугацаанд АНУ-тай тохиролцоонд хүрэх хүсэлтэй байгаагаар тайлбарлагдаж байгаа бололтой. Энэ жил жагсаалын оронд маш олон хос одоогийн удирдагчийн өвөө, эцэг хоёрын хөшөөнд цэцэг өргөж, гэрлэлтээ батлуулах ёслол хийснийг сэтгүүлчид онцолсон байна. Мөн соёлын том арга хэмжээ явагдсан. Эрх баригчид нийслэлийн гудамж талбайг "БНАСАУ мандтугай" гэсэн уриагаар чимж, ТВ-ээр 1948 оны есдүгээр сарын 9-нд байгуулагдсан цагаасаа хойш ХОйд Солонгос нь ямар их хүнд бэрхийг туулан өнөөгийн цэнгэл жаргалд хүрсэн тухай баримтат кино гаргасан байна. Хойд Солонгосын төв хэвэл "Нодон Симун" нь "Тусгаар тогтнолоороо бахархаж буй агуу гүрэн" гэсэн гарчигтай нийтлэл бичсэн байна. Түүнд "БНАСАУ нь гаар нутаг ба хүн амын тоогоор жижиг хэдий ч хүчирхэг бөгөөд тусгаар тогтносон гүрэн гэзгээрээ тодоос тод гэрэлтэн дэлхийн улс төрийн хандлагын удирдан залахад манлайлах байр суурийг эзэлсээр байна" гэж дурджээ. Гэхдээ энэ удаагийн улс байгуулагдсан баярын хамгийн том дуулиан нь Дональд Трамп ба Ким Жон Ун нарын уулзалтад зориулагдсан марк хэвлэгдсэн явдал юм. Уламжлал ёсоор империалист, дээрэнгүй булаан эзлэгч гэсэн цол гуншин өгдөг улсын төрийн тэргүүнтэй хамт гар барин уулзаж байгаа марк хэвлэнэ гэдэг дэлхийн дахины хувьд гэхээс юун түрүүнд хойд солонгосчуудын хувьд тун гайхалтай хэрэг билээ. Энэ бол Ким Жон Ун нь Трамптай тохиролцоонд хүрнэ гэдэгт итгэлтэй байгаагийн жишээ гэж шинжээчид дүгнэжээ. Ямар ч байлаа гээд Хойд Солонгосыг хэнээ ч хараат бус, бие даасан, зөвхөн өөрийн хүчээр хөгжиж байгаа тусгаар улс гэдэгтэй хэн ч маргахгүй биз.