​ПУТИН ШАТДАГ ХИЙН ХООЛОЙГ МОНГОЛООР ДАЙРУУЛАХ БОЛОМЖИЙГ СУДЛАХ ҮҮРЭГ ӨГӨВ

ОХУ-ын Ерөнхийлөгч Путин "Газпром"-ын тэргүүн Алексей Миллерийг хүлээн авах үеэр Ямал дахь орд газраас шатдаг хий Хятад руу нийлүүлэх хоолойг тавихдаа Монголын нутгаар дайруулах боломжийг судалж үзэх үүрэг өгсөн тухай "ТАСС" мэдээлж байна. Хятад руу тавих шатдаг хийн хоолойг баруун чиглэлээр тавьж эхлэхийн өмнө Эрхүү муж, Красноярын хязгаар, Ямал дахь шатдаг хийн нөөцийг нарийвчлан тогтоох шаардлагатай байгааг Путин онцолжээ. Ингэхдээ Путин энэ чиглэлийг "Тун амаргүй зам ч гэлээ бодит байх боломжтой" гэж байна.

Харин Миллер нь "Газпром" компанийг энэ оны арванхоёрдугаар сарын 1-ээс эхлэн "Сибирийн хүч" хий дамжуулах хоолойгоор Оросын хийг Хятад нийлүүлж эхлэхээр болсон тухай илтгэв. Миллер энэ талаар "Дэлхийн шатдаг хийн хамгийн том экспортлогчоос хамгийн том импортлогч руу нийлүүлэлт хийж эхлэх тул түүхэн үйл явдал болно" гэж онцолсон байна. Энэхүү хоолойгоор 30 жилийн дотор Хятадад 1 их наяд шоо метр шатдаг хий нийлүүлэх юм байна. Мөн Хятадын зах зээл дэлхийн хамгийн хурдтай хөгжиж байгаа зах зээл гээд Хятад руу өөр замаар шатдаг хий нийлүүлэх боломжийг судалж байгааг хэлжээ.