ЖОШУА ВОНГИЙГ АХИН БАРИВЧИЛЖЭЭ

Хонконгийн эсэргүүцлийн жагсаалыг зохион байгуулагчдын нэг "Demosisto" намын үүсгэн байгуулагч, Ерөнхий нарийн бичгийн дарга Жошуа Вонг Хонконгийн нисэх буудалд ахин баривчлагдсан тухайгаа туслахаараа дамжуулан олон нийтэд мэдэгдсэн тухай "RTHK" мэдээлж байна.

Үүнээс өмнө буюу наймдугаар сарын 30-нд Хонконгийн цагдаа Жошуа Вонг болон өөр хоёр идэвхтнийг зөвшөөрөлгүй жагсаал зохион байгуулж, оролцсон, бусдыг өдөөн хатгасан хэргээр баривчилсан ч шүүхээс тэр өдөртөө бүгдийг сулласан. Гэтэл өнгөрөгч ням гарагт Вонгийг Герман явахаар нисэх буудалд ирэх үед барьцаагаар суллагдах нөхцөл зөрчсөн гэж саатуулсан байна. Жошуа Вонг Твиттер дээрээ "Өнөө өглөө цагдаа нар нисэх буудлын гааль дээр намайг барьцаалан суллагдах нөхцөл зөрчсөн хэргээр баривчиллаа. Одоо би хоригдож байна" гэж бичжээ.

Гэтэл барьцаагаар суллагдахдаа тэрээр Герман, АНУ-руу аялах тухайгаа урьдчилан мэдэгдээд байсан тул баривчилгааг өөрийнх эсрэг чиглэсэн үйлдэл гэж бодож байгаа бололтой.

Энэ зуур хэдэн мянган жагсагчид Хонконгийн гудамжинд гарч жагссан бөгөөд зарим нь АНУ-ын Ерөнхий консулын газрын гадаа ирж Америкийн Засгийн газраас тусламж гуйсан тухай "South China Morning Post" сонин мэдээлж байна. Жагсагчдын нэг нь цугласны олны өмнөөс үг хэлэхдээ АНУ-ыг Хонконг дахь ардчилал ба хүний эрхийг дэмжсэн хууль батлахыг хүссэн аж. Зарим нь "Ерөнхийлөгч Трамп, Хонконгийн чөлөөлөөч" гэсэн бичигтэй зурагт хуудас өргөж байсан бол зарим нь АНУ-ын төрийн дуулал дуулж "Бээжинг эсэргүүцье" гэсэн уриаг хашхирч байсан аж.