ЧЕЧЕНИЙ ЭКС ЕРӨНХИЙЛӨГЧИЙН ХАМСААТНЫГ ХӨНӨӨСӨН ХЭРЭГТ ОХУ БУРУУГҮЙ ГЭВ

Берлин хотод чечень гаралтай Гүржийн иргэн хөнөөгдсөн хэрэгт ОХУ-ын тусгай албад хамаатай гэх мэдэгдлүүдийг ямар ч үндэслэлгүй, хоосон яриа болохыг Оросын Гадаад хэргийн яам албан ёсоор мэдэгджээ. Германы "Spiegel" сонин тус хэргийн талаар эрэн сурвалжлаад алагдсан этгээд хэрэг гарахын өмнөхөн Оросын дипломат ажилтнуудтай уулзаж, гадаад паспортынхаа хуулбарыг өгсөн гэдгийг баталсан тухайгаа нийтлээд байсан.

Наймдугаар сарын 23-нд Берлин хотын нэгэн цэцэрлэгт хүрээлэнд Зелимхан Хангошвили гэгч чечень гаралтай Гүржийн иргэнийг буудан хороосон хэрэг гарсан. Дугуй унасан гэмт хэрэгтэн хохирогчид ойртон дуу намсгагчтай гар буугаар толгой руу нь буудаад зугтахыг оролдсон ч Германы цагдаа нар гудамжны хяналтын камерын тусламжтайгаар 49 настай Оросын иргэнийг энэ хэрэгт сэжиглэн удалгүй баривчилсан байна.

Герман, Турк, Францад амьдардаг чечень хүмүүсийн ярьж байгаагаа буудуулсан Хангошвили нь чечений алан хядагчдын толгойлогч Шамиль Басаев ба салан тусгаарлагчдын байгуулсан Чечений бүгд найрамдах Ичкер улс гэгчийн Ерөнхийлөгч Аслан Масхадовын дотны хүмүүсийн нэг байжээ. Чечений дайны үеэр Хангошвили нь 50-60 зэвсэглэсэн хүмүүс бүхий нэг бүлэглэлийн дарга хийдсэн байж.

Энэ хэрэг дээр хамтарсан эрэн сурвалжлах ажил явуулсан "Spiegel", "The Insider" сонинууд, эрэн сурвалжлах сэтгүүл зүйн "Bellingcat" бүлгийн хамтарсан мэдэгдэлд баривчлагдсан хүнийг Оросын тусгай албаны ажилтан гэж мэдэгдсэн байгаа. Эд мөрдлөг хийх явцдаа сэжигтний гадаад паспортын дугаар нь Оросын армийн тагнуулын алба"ГРУ"-д зориулан хуурамч бичиг баримт үйлддэг байсан паспортын хэлтсийнх гэдгийг тогтоосон юм гэнэ. Гэвч Оросын эрх баригчид энэ бүх нотолгоог ямар ч үндэслэлгүй, Хангошвилийн үхэлд ямар ч хамааралгүй тухайгаа албан ёсоор мэдэгдсээр байгаа юм.

Аслан Масхадов нь чечений салан тусгаарлагчдын байгуулсан Ичкер улсын Ерөнхийлөгчөөр 1999 онд сонгогдсон байдаг. Улмаар 2000 он гарсны дараа хил залгаа Дагестаныг эзлэн авч Лалын вант улс байгуулахыг завдахад Чечений хоёрдугаар дайн эхэлсэн. Энэ дайны үеэр чечений алан хядагчид бүхэлдээ ялагдал хүлээж, Ичкер гэдэг улс үгүй болсонбөгөөд Масхадовыг Оросын тусгай хүчнийхэн нууц ажиллагаа явуулан хорогдох байранд нь устгасан байдаг.