​ИРАНЫ ЭСРЭГ ХОРЛОН СҮЙТГЭХ АЖИЛЛАГАА ЯВУУЛБАЛ 15 САЯ ДОЛЛАРООР УРАМШУУЛНА

Ираны дээд удирдагчийн шууд удирдлага дор үйл ажиллагаа явуулдаг "Лалын хувьсгалыг хамгаалагчдын корпус" гэдэг байгууллагын санхүүгийн бүх төрлийн ажиллагааг тасалдуулсан хорлон сүйтгэх ажиллагаа явуулбал АНУ-аас 15 сая хүртэлх доллароор урамшуулах тухай АНУ-ын Ираныг асуудал хариуцсан тусгай төлөөлөгч Брайан Хук мэдэгджээ. Ингэхдээ Америк нь түүхэндээ анх удаа тусгаар улсын дээд удирдлага, түүний мэдэлд байдаг байгууллагын эсрэг ил тод хорлон сүйтгэх ажиллагаа явуулахыг уриалж байгаа гэдгийг Брайан Хук хүлээн зөвшөөрсөн байна. Тэрээр "Бид Лалын хувьсгалыг хамгаалагчдын корпус ба "Аль Кудс" хүчний бүх төрлийн санхүүгийн гүйлгээ, ажиллагааг тасалдуулахад тусалж чадах хүнд 15 сая доллар хүртэл урамшуулал олгох тухайгаа мэдэгдэж байна. Лалын хувьсгалыг хамгаалагчдын корпус Засгийн газрын гэхээс илүүтэйгээр алан хядаг байгууллага хэлбэрээр үйл ажиллагаа явуулдаг тул бид ийм алхам хийлээ" гэж мэдэгджээ. 2019 оны дөрөвдүгээр сард Вашингтон нь Лалын хувьсгалыг хамгаалагчдын корпус ба "Аль Кудс"-ыг ХАМАС болон "Хезболлах" гэсэн алан хядагч байгууллагуудыг дэмждэг гэсэн шалтгаанаар алан хядах байгууллагын жагсаалтад оруулсан. Үүний хариуд Иран нь АНУ-ын Батлан хамгаалах яамыг өөрийн гаргасан алан хядах байгууллагын жагсаалтад оруулсан. Ираны "Лалын хувьсгалыг хамгаалагчдын корпус" гэж нэрлэгддэг байгууллагыг Засгийн газарт захирагддаггүй, шууд дээд удирдагч аятоллад захирагддаг, тусдаа санхүү, төсөв, нисэх хүч, тэнгисийн цэрэгтэй, армитай тул улс доторх улс ч гэж нэрлэдэг. Батлагдаагүй мэдээгээр энэ байгууллага нь Ираны эдийн засгийн 20-30 хувийг дангаар хянадаг.