​КАЗАХСТАНД ХЯТАДЫН ҮЙЛДВЭР БАРИХЫГ ЭСЭРГҮҮЦСЭН ХҮМҮҮС ЖАГСААЛ ХИЙЖ БАЙНА

Казахстанд Хятадын үйлдвэрүүд барихыг эсэргүүцсэн хүмүүс лхагва гарагийн орой гурван хотод жагсаал хийсэн тухай "Reuters" агентлаг мэдээлж байна. Бүр тодруулбал тэд Казахстаны Засгийн газраас санаачилсан хөрөнгө оруулагчдыг татах, шинэ ажлын байр бий болгох санаачлаг гэгчийг эсэргүүцэж байгаа юм. Хил залгаа Хятад нь Казахстан улсын хамгийн том хөрөнгө оруулагч, худалдааны түнш болж хувираад байгаа ч Бээжингээс явуулж байгаа Шинжаан -Уйгарын уугуул үндэстнүүдийг "илбэн тохинуулах" бодлого, Казахстанд улам бүр түрэн орж ирж байгааг дагаад эсэргүүцэгчдийн тоо ч нэмэгдэж байгаа аж. Хятадыг эсэргүүцсэн эхний жагсаал ням гарагийн орой, Казахстаны баруун нутаг дахь Жанаозен хотоос болсон байна. Энэ хотод гудамжинд гарч жагссан хүмүүс Засгийн газрынхаа төлөвлөгөөг Хятадын хуучирсан, байгаль орчныг бохирдуулдаг үйлдвэрүүдийг Казахстан руу нүүлгэх төлөвлөгөө гэж нэрлээд эсэргүүцсэн. Орон нутгийн "Лада" сонины мэдээлснээр жагсагчдын тоо даваа гараг гэхэд 300 хүн болж өссөн. Улмаар Казахстаны нийслэл Нур –Султан, тус улсын хамгийн том хот Алма-Атад адил утгатай шаардлага тавьсан жагсаал гарсан. Алма-Ата хотын захиргааны өмнө болсон эсэргүүцлийн арга хэмжээнд ойролцоогоор 30 хүн оролцсон бол Нур-Султаны талбайн нэгэнд болсон цуглаанд 20 хүн оролцсон байна.