​ИНДОНЕЗИ ХОГ АЧСАН ЧИНГЭЛГҮҮДИЙГ БУЦААСААР БАЙНА

Индонези нь зургаан сараас хойш хууль бусаар оруулж ирсэн хог ачсан чингэлгүүдийг олноор нь явуулсан улсууд руу нь буцааж байгаа тухай "Le Figaro" сонин мэдээлжээ. Индонезийн гаалийн албаны төлөөлөгч Дени Суржанторо нь сэтгүүлчдэд "Энэ зун илрүүлэн хураан авсан 250 орчим чингэлгийг илгээгч улсууд руу буцаагаад байна" гэж мэдээлжээ. Хог ачсан чингэлгүүдээ буцаан авсан орнуудын дотор АНУ, Их Британи, Герман, Австрали, Хонконг орж.

БНХАУ нь 2018 онд гадаадаас хуванцар хаягдал импортлон авахаа зогсоох тухай шийдвэр гаргасан нь дэлхийн хог хаягдал дахин боловсруулах зах зээлийг эм замбараагүй байдалд оруулсан байдаг. Улмаар ийм төрлийн хог хаягдлыг хамгийн их хэмжээгээр авдаг байсан улс нь татгалзсаны дараа өндөр хөгжилтэй орнууд нь хог хаягдлыг нь хүлээн авах өөр улсын орны эрэлд гарсан. Түүнээс хойш асар их хэмжээний хаягдлыг Зүүн Өмнөд Ази руу явуулах болсон. Гэвч энэ бүс нутагт хуванцар хаягдлыг дахин боловсруулах хүчин чадал нь хангалтгүй, хязгаарлагдмал тул хогийн цэг дээр их хэмжээгээр хуримтлагдсаар далай тэнгисийг бохирдуулж эсвэл гар аргаар шатаахад агаар мандлыг ихээр хордуулах болсон.

Өндөр хөгжилтэй орнуудаас Зүүн Өмнөд Азийг чиглэсэн хог хаягдлын асуудлыг хамгийн анх Филиппиний Ерөнхийлөгч Дутерте энэ оны тавдугаар сард хөндсөн байдаг. Тухайн үед Канадаас 2013-2014 онуудад хуванцар хаягдал нэрээр ахуйн хог хаягдал ачсан 100 гаруй чингэлэг явуулаад буцааж авахаас татгалзаад байсан юм. Иймд Дутерте нь Канадыг хогоо эргүүлж авахгүй бол "Дайн зарлана. Өөрөө биеэр хүргэж өгнө" гэж мэдэгдсэний дараа л чингэлгүүдийг буцаан татаж эхэлсэн. Үүний дараа Зүүн Өмнөд Азийн бусад орнууд ч өндөр хөгжилтэй улсуудаас явуулсан хог хаягдал чихсэн чингэлгүүдийг буцааж эхэлсэн. Дутерте "Филиппин бол тусгаар тогтносон үндэстэн тул бусад улс орнууд хогийн цэг гэж хандах хэрэггүй юм. Энэ мэдэгдэл бусад орнуудын чихэнд хүрнэ гэдэгт найдаж байна" гэж хэлсэн байдаг. WWF байгууллагаас гаргасан мэдээгээр дэлхийд жил болгон 330 сая тонн хуванцар үйлдвэрлэгдэн гарч байдгаас дийлэнх нь хогийн цэг дээр хаягдаж, тэндээсээ далай тэнгисийг бохирдуулдаг.

https://twitter.com/azarijahromi/status/1169081655023345664