TESLA ЗИМБАБВЕД ТУСАЛНА

Зимбабве улсын эдийн засаг цахилгаан үйлдвэрлэгчид ба аккумуляторуудаас бүрэн хамааралтай болж хувираад байгаа тухай "Bloomberg" агентлаг мэдээлж байна. Энэ улсад бэлэн мөнгөний архаг хомсдол үүссэний улмаас ийм байдалд оржээ.

Зимбабве нь үндэсний валют болох зимбабве долларыг гүйлгээндээ ашиглахаа болиод удаж байгаа юм. Оронд нь АНУ-ын доллар, Өмнөд Африкийн рэнд, БНХАУ-ын юань болон бусад орны валютыг гүйлгээндээ ашигладаг. 2000-аад оны сүүлээр гипер инфляц үүсгэсэн валютын хямралын дараагаар Засгийн газар нь үндэсний валютаа эргэлтээс бүрэн гаргасан.

Үүний дараагаар Зимбабвегийн экспортлогчдын улсдаа оруулж ирдэг гадаад валют ч хүрэлцэхгүй болж ирсэн. Иймд Засгийн газраас доллароор үнэлсэн зээлийн үнэт цаас буюу бонд гэсэн зохиомол валют гаргаж ирсэн.

Энэ үеэр Зимбабвегийн үүрэн телефоны хамгийн том оператор "Econet Wireless" нь электрон төлбөр, шилжүүлэх болон зарим төрлийн банкны үйлчилгээг хийх боломжтой "EcoCash" нэртэй шинэ үйлчилгээг нэвтрүүлсэн байдаг. Энэхүү үйлчилгээ нь оршин суугчдын талархлыг хүлээснээр маш өргөн ашиглагдах болсон. Бэлэн мөнгөний шаардлага багассан ч гэлээ өөр нэг асуудал тулгарсан байна.

Зимбабве нь цахилгаан хангамжийн хурц хямралтай тулгараад байгаа. Цахилгааны саатал хоногт 18 цагийн турш үргэлжлэх нь хэвийн үзэгдэл болсон. Үүнээс болоод "Econet Wireless"-ийн хэрэглэгчдийн ухаалаг утасны цэнэг дуусаж гүйлгээ хийж чадахгүй байх нь эрс олширсон. Мөн үүрэн телефоны оператор нь суурь станцуудад нь цахилгааны саатал үүссэнээр бүрэн ажиллаж чадахгүй болсон байна. Иймд тус компани нь аккумулятор үйлдвэрлэгчид, тэр дундаа Америкийн "Tesla" компанид хандан үүрэн телефоны дамжуулах станцуудыг цахилгаанаар хангах хүчтэй аккумулятороор тоноглож өгөх хүсэлт гаргасан байна.

Одоогоор "Econet Wireless" компанид аккумулятор нийлүүлж байгаа "Distributed Power Africa" нь хөдөлгөөнт хоёр зай хураагуурыг дамжуулах станц бүрд байршуулж өгвөл цахилгаан тасарсан үед 10 цаг хүртэл хугацаагаар хэвийн ажиллуулах боломжтой гэж мэдэгдсэн байна. "Tesla" энэхүү хүсэлтийг хүлээн авбал түүний хувьд хэрэгжүүлэх хамгийн том төсөл нь болж хувирах төдийгүй тэдний жишгээр хөрш зэргэлдээ Конго зэрэг улсуудад үүссэн адил асуудлыг шийдэх боломжтой болох аж.