ЭРДОГАН ГРЕКИЙН АРЛУУДЫГ ТУРКИЙНХ БОЛГОСОН ГАЗРЫН ЗУРГИЙН ӨМНӨ ЗУРАГ ДАРУУЛЖЭЭ

Туркийн Ерөнхийлөгч РежепТайипЭрдоганЭгейн тэнгисийн зарим хэсэг болон Грекийн мэдлийн зарим арлыг Туркийн эдийн засгийн онцгой эрхтэй бүст оруулж харуулсан газрын зургийн өмнө фото зурагдаруулсан тухай Грекийн "Protothema" сонин мэдээлжээ.

Туркийн Үндэсний батлан хамгаалахын их сургуулийн сонсогчдыг тангараг өргүүлэх ёслолын үеэр энэ зургийг авсан байна. Эрдоганы ард "Хөх цэнхэр эх орон, 462 000 км" гэсэн бичиг бүхий газрын зураг гарсан. Түүн дээр Эгейн тэнгисийн зүүн хэсгийг бүхэлд нь, Грекийн мэдэлд байдаг Лемнос, Родос, Хиос зэрэг арлууд бүхэлдээ Туркийн мэдлийнх болж гарчээ.

Энэ оны долоодугаар сард Европын холбоо нь Кипр арлын эдийн засгийн онцгой мэдлийн бүст газрын тос, шатдаг хийн орд газрын хайгуул хийлээ гэж Туркийн эсрэг хориг арга хэмжээ авахаар болсон. Хориг арга хэмжээний тоонд санхүүгийн тусламж үзүүлэхээ багасгах, нисэх онгоцны нислэгийн талаар хэлэлцээг зогсоох, бизнес эрхлэхийг хэсэгчлэн хориглох зэрэг заалт оржээ. Турк нь Кипр арлын орчмын байгалийн баялгийг олборлох эрхтэй гэж мэдэгдээд "Фатих", "Явуз" өрөмдлөгийн цамхгуудаа байрлуулаад байгаа юм.