​БЕСЛАНЫ СУРГУУЛЬД АМЬ ҮРЭГДСЭН ХҮМҮҮСИЙН ДУРСГАЛЫГ ХҮНДЭТГЭХ ЁСЛОЛ БОЛЖ БАЙНА

ОХУ-ын Умард Осетийн Беслан хотноо 15 жилийн өмнө болсон алан хядах ажиллагааны үеэр амиа алдсан хүмүүсийн дурсгалыг хүндэтгэх гурван өдрийн эмгэнэлийн ажиллагаа эхэлжээ. Есдүгээр сарын 1-нд хуучин №1 сургуулийн байранд хонх дуугарснаар энэхүү арга хэмжээ эхэлсэн байна. Алан хядагчид хүүхдүүдийн барьцаалж байсан сургуулийн спортын зааланд хүмүүс цэцэг, зул өргөжээ. Есдүгээр сарын хоёронд сургуулийн өмнөх талбайд дурсгалын цэцэг өргөх ёслол болж гурванд амь үрэгдэгсдийн хойдохыг даатгасан мөргөл үйлдэн дурсгалын оршуулгын газар загалмайт цуваа алхана. 2004 оны есдүгээр сарын 1-нд Беслан хотын №1 сургуульд хичээлийн шинэ жил эхэлсэн ёслолын арга хэмжээ болох үеэр алан хядагчид дайран эзэлж хүүхэд голдуу хэдэн зуун хүнийг барьцаалсан аймшигт хэрэг болсон билээ. Оросын эрх баригчид барьцааны хүүхдүүдийг суллахын тулд алан хядагчидтай гурав хоногийн турш хэлэлцээ хийж гэж оролдсон ч үр дүнд хүрээгүй тул дайралт эхлүүлсэн байдаг. Барьцааны хүмүүсийг суллах явцад 334 хүн амиа алдсаны 186 нь хүүхдүүд байжээ. Барьцааны хүмүүсийг суллах ажиллагааны үеэр алан хядагчдаас ганц хүнийг олзолж бусдыг нь устгасан байдаг. Энэхүү аймшигт хэргийг зохион байгуулсан гэдгээ чечень алан хядагч Шамиль Басаев албан ёсоор мэдэгдэж байсан юм.