​60 САЯ ДОЛЛАР ХОЖСОН ХҮН ШАГНАЛЫН ТУХАЙГАА ГЭР БҮЛЭЭСЭЭ НУУЖЭЭ

Канадын Эдмонтон хотод амьдардаг хүн сугалаагаар 60 сая канад доллар хожсон ч тэр тухайгаа гэр бүлээсээ нуун хэлээгүй тухай "Global News" мэдээлж байна. 30 жилийн тэртээ Вьетнамаас цагаачлан ирсэн Бон Труонг гэгч хүн 2018 оны аравдугаар сарын сүүлээр сугалаагаар ийм их мөнгө хожсон ч тэр талаараа хэнд ч ам нээгээгүй явж. Бон Труонг нь арав гаруй жилийн турш сугалаа худалдан авах болгондоо нэг л тоонуудыг бичиж бөглөн, тэвчээртэй хүлээдэг байсан нь ийнхүү амжилт авчирчээ. Мань хүн их мөнгө хожсон гэдэгтээ итгэхгүй байснаа дурсан "Би хожилдоо бат итгэлтэй байхын тулд дэлгүүр явж ороод худалдагчаас нь хожлын дугааруудыг цаасан дээр хэвлэж өгөхийг өгөхийг хүссэн" гэжээ. Гэрийнхэн нь их мөнгийг дагаж ирдэг эрс өөрчлөлтөд бэлтгэх хэрэгтэй гэж үзээд одоо болтол хожлынхоо талаар хэлээгүй аж. Бон нь гурван хүүхэдтэй, тэднийгээ мөнгө хожсон байлаа ч уйгагүй ажиллах ёстой гэж үздэг гэдгээ хэлсэн байна. Тэрээр супер шагнал хожсон ч хуучин ажлаасаа гарахгүй, хэсэгхэн мөнгөөр өр, зээлээ дараад шинэ байшин авч, үлдсэнийг нь хадгална гэжээ. Бон Троунгийн хожил нь "Lotto Max" сугалааны түүхэнд гарч байсан хамгийн өндөр хожлын нэгд тооцогддог.