АВСТРАЛИД ГАДААДЫН ТАГНУУЛУУД ХЭЗЭЭ Ч БАЙГААГҮЙ ОЛОН БОЛСОН

Австралид үйл ажиллагаа явуулдаг гадаадын тагнуулуудын тоо, хамрах хүрээ "урд үзэгдээгүй их" болж, нэг ёсондоо тэдний хөлд дарагдах дээрээ тулаад байгаа тухай тус улсын Дотоод тагнуулын үндэсний агентлаг (ASIO) мэдээлсэн байна. Хамгийн сүүлд гэхэд Африкийн Руанда улсын тагнуулын томоохон сүлжээг илрүүлэн аюулгүй болгожээ.

ASIO-ийн мэргэжилтнүүд нь Австралийн жирийн иргэд гадаадын тагнуулын сүлжээнээс учирч байгаа бодит аюулын цар хүрээг ухамсарлахгүй, гадаадаас ирсэн хүмүүсийг тагнуул эсвэл бүр алан хядагч болгон элсүүлэхэд ямар хялбар байдгийг ойлгохгүй байна гэж мэдэгджээ. ASIO-ийн хэвлэлийн төлөөлөгч нь энэ талаар "Одоо явагдаж байгаа гадаадын оролцоо, тагнуулын ажиллагаа урд үзэгдээгүй их цар хүрээтэй явагдаж байгаа нь Австралид аюулгүй байдалд заналхийлж байна" гэжээ.

Австралийн Үндэсний их сургуулийн улс төр судлаач Жон Блэкслэнд ASIO-ийн мэдэгдэл нь бодит байдалд нийцэж байгаа ч асуудлын зөвхөн нэг талыг л харуулж байна гэжээ. Тэрээр "Төрийн албад, корпорацууд, сургуулиудын гаргаж байгаа шийдвэрийг өөртөө ашигтай болгуулахын тулд Австралид амьдарч байгаа иргэдээ ашигладаг улс орон цөөнгүй байдгийг бид мэднэ. Үүний тулд заримдаа дипломат төлөөлөгчдийн газраа тагнуул суулгадаг бол заримдаа дүрвэгч, цагаачдыг сүрдүүлж эсвэл албадах байдлаар мэдээлэгч болгож болдог нь Руанда төдийгүй Хятад зэрэг бусад олон оронд хамааралтай юм" гэж онцолсон байна.

Дарамт, шахалт үзүүлэх хэрэгсэл болгон ашиглах боломжтой гэр бүл, төрөл саднаа нутагтаа үлдээгээд ирсэн цагаачид, дүрвэгчдийг мэдээлэгч болгон элсүүлэхэд хамгийн эмзэг байдаг гэдгийг шинжээчид онцолж байна. Австралийн сөрөг тагнуулын албаны мэдээлэл дээр үндэслээд ASIO-ийн мэдээлж байгаагаар БНХАУ, Саудын Арави, Иран, Сири, Хойд Солонгос, Малайз зэрэг улсууд нь Австралийн нутаг дээр амьдардаг нутаг нэгтнүүдээ хянадаг төдийгүй Засгийн газраа эсэргүүцдэг хүмүүсийг дуугүй болгохыг хичээдэг аж.

Гэхдээ ингэлээ гээд бүх цагаачдыг хавтгайруулан буруутгаж болохгүй гэдгийг ASIO онцолж байна.