​БАНГЛАДЕШТ СҮЙТ БҮСГҮЙЧҮҮД ОХИН БИЕЭРЭЭ ГЭДГЭЭ МЭДЭГДЭХ АЛБАГҮЙ БОЛОВ

Бангладеш улсад шинэ хууль батлагдсанаар хуримлах гэж байгаа сүйт бүсгүй гэрлэлтийн баталгаан дээр охин биеэрээ гэдгээ зарлах шаардлагагүй болж байгаа тухай "South China Morning Post" сонин мэдээлсэн байна. Өмнө нь бангладеш эмэгтэйчүүд хуримлахдаа гэрлэлтийн баталгаан дээр "кумари" буюу "онгон", бэлэвсэн эсвэл салсан эсэхээ заавал дурдан зааж байх ёстой байж. Харин одооноос шинэ хуулийн дагуу "кумари" гэсэн хэсгийг "нөхөрт гарч байгаагүй" болгон өөрчилсөн байна. Ингээд зогсохгүй гэрлэх гэж байгаа сүйт хархүү өмнө нь гэрлэж байсан эсэх талаар гэрлэлтийн баталгаан дээрээ заах ёстой болжээ. Хүн амын нь дийлэнх нь лалын шашинтай Бангладеш улс нь гэрлэлт ба салалтын тухай өмнөх хуулийг 1974 онд баталж байжээ. Харин хүний эрхийг хамгаалагчид тус хуулиас "кумари" гэсэн заалтыг хасах талаар 2014 оноос эхлэн тэмцээд ийнхүү амжилтад хүрсэн байна.