​BREXIT–ИЙГ ХЭРЭГЖҮҮЛЭХИЙН ТУЛД ПАРЛАМЕНТЫН ҮЙЛ АЖИЛЛАГААГ ТҮР ЗОГСООЛОО

Их Британийн Ерөнхий сайд Борис Жонсон "Brexit"-ийг хэрэгжүүлэхийн тулд парламентын ажиллагааг есдүгээр сарын 3-аас аравдугаар сарын 14-н хүртэл түр зогсоох хүсэлтийг II Елизаветад өргөн барихад хатан хаан ёсоор болгосон тухай "Sky News" мэдээлж байна.

Европын холбоо нь Их Британийг тус холбооноос гарахдаа дараах нөхцөлтэй гэрээ байгуулахыг шаардаж байгаа юм. Үүнд: Европын холбооны гишүүн орнуудтай тусад нь хэлэлцээ хийхгүй, гарахтай холбоотой дараагийн шатны хэлэлцээг эхлүүлэхийн өмнө гишүүнчлэлийн хугацаандаа төлөх ёстой байсан санхүүгийн төлбөр тооцоогоо нэн тэргүүнд төлж барагдуулах, Бүгд найрамдах Ирланд улс ба Их Британийн бүрэлдэхүүнд багтдаг Умард Ирландын хооронд гааль, татвар зэрэг зүйлс бүхий хилийн зурвас байгуулахгүй байх.

Европын холбооны гишүүн байхдаа хүлээсэн үүргийн дагуу төлөх мөнгөний хэмжээг 100 тэрбум еврогоос 30 тэрбум хүртэл янз бүрээр нэрлэж байгаа. Европын холбоо нь Их Британи тус холбооноос гарлаа ч Умард Ирланд нь Европын гаалийн холбооны гишүүн хэвээр үлдэх ёстой гэж үзээд байгаа юм. Бэкстоп гэж нэрлэгдсэн энэ асуудлын Европын холбооны шаардаад байгаагаар шийдвэл Умард Ирландад Европын холбооны бүх хууль дүрэм үйлчилсэн хэвээр үлдэх тул Их Британи дотроо хилийн зурвас, гааль байгуулах шаардлагатай болно. Энэ байдал Лондонд таалагдахгүй байгаа нь мэдээж.

Борис Жонсон нь Европын холбоотой энэ гэрээг байгуулсан үгүйгээс үл хамаараад аравдугаар сарын 31-н гэхэд Их Британи нь тус холбооноос гарна гэж удаа дараалан мэдэгдсэн. Харин үүнд нь парламентын байр суурь ихээхэн саад болж байгаа тул хатан хаанд ийм хүсэлт тавихаас өөр аргагүй болсон бололтой.

Британийн парламентчид есдүгээр сарын 3-нд амралтаа авах тул Жонсонд шаардлага гарвал Европын холбооноос гэрээ байгуулалгүй гарахад нь саад болоход хугацаа хүрэлцэхгүй болно гэж тооцсон бололтой.

Их Британийг Европын холбооноос гарах тухай бүх нийтийн санал асуулга 2016 оны зургаадугаар сард болоход асуулгад оролцсон хүмүүсийн 52 хувь нь гарахыг дэмжсэн юм. Улмаар Их Британи нь 2019 оны гуравдугаар сарын 29-нд Европын холбооноос гарах ёстой байсан ч Ерөнхий сайд асан Тереза Мэй нь гарах талаар парламентын тавьсан нөхцөлөөр тохиролцож чадаагүй тул огцорч, Борис Жонсон шинэ Ерөнхий сайд болсон юм.