ТЭГШ ЭРХИЙГ ХАНГАХЫН ТӨЛӨӨ АВЬЯАСЛАГ ХҮҮХДҮҮДИЙГ ДЭМЖИХ ХӨТӨЛБӨРИЙГ ЗОГСООНО

Нью-Йорк хотын сургуулиудад ёс зүйн нийцтэй байдлыг хангах үүднээс дунд сургуулиудын авьяаслаг хүүхдүүдийг дэмжих хөтөлбөрийг хасч магадгүй байгаа тухай "The New York Times" сонинд бичсэн байна. Учир нь, улсын мэдлийн сургуулиудад хэрэгждэг авьяаслаг хүүхдийн хөтөлбөрт цагаан арьстнууд, Азиас гаралтай хүүхдүүд гол төлөв суралцдаг. Харин хар арьстан болон латин америкчууд нь дийлэнхдээ жирийн хөтөлбөрөөр суралцдаг аж. Энэ байдал нь дунд сургуулиудад арьсны өнгөөр ялгаварлан гадуурхах нөхцөл бүрдүүлж байна гэж зарим эцэг, эхчүүд үзэж байгаа.

Авьяслаг хүүхдүүдийг дэмжих хөтөлбөр нь боловсролын системд арьсны өнгөөр ялгаварлах байдал үүсгэж байна гэж үздэг хүмүүсийн нэг нь Нью-Йорк хотын мэр Билл де Блазио. Гэвч мэрийн байр суурь нь хар арьст ба латин америк зарим эцэг, эхчүүдийн дэмжлэгийг авахгүй байгаа юм. Тэд авьяаслаг хүүхдийг дэмжих хөтөлбөр нь сурагчдад илүү сайн боловсрол олгох боломж олгодог гэж үзэж байна. Гэхдээ ийм гэр бүлийн зарим нь авьяаслаг хүүхдийн хөтөлбөр нь ердийн сургуулиудад зарцуулагдах ёстой хөрөнгийг үрэн таран хийж байна гэж үзэж байгаа аж.

Харин Ази гаралтай хүүхдүүдийн эцэг, эх үүнтэй санал нийлэхгүй байна. Тэд хүүхдийг илүү сайн нийгэмшихэд ийм хөтөлбөр тус болно гэж мэдэгджээ. Олон нийтийн сүлжээнийхэн мөн л хөтөлбөрийг дэмжжээ. Хэрэв ийм хөтөлбөрийг хасвал авьяаслаг хүүхдүүдтэй гэр бүл өөр хотууд руу нүүх тул Нью-Йорк хот яваандаа мэргэжилтэй боловсон хүчний дутагдалд орно гэж анхааруулсан байна.

Нью-Йорк хотод 2018 оны байдлаар 16 мянган хүүхэд авьяаслаг хүүхдийг сургах хөтөлбөрөөр суралцсаны 75 хувь нь цагаан арьстнууд, ази хүүхдүүд байжээ.