​ЭНЭТХЭГИЙГ САНРСЫН УУДАМД ХОГ ТАРИЛАА ГЭЖ БУРУУТГАВ

Америкийн агаар ба сансрын уудмыг судлах агентлаг NASA нь Энэтхэгчүүдийн туршсан хиймэл дагуулын эсрэг зэвсэг дэлхийн тойрог замд ихээхэн хог үүсгэсэн тухай мэдээлжээ. Туршилтын үеэр устгасан хиймэл дагуулын 50 орчим хэлтэрхий дэлхийн тойрог замд байгаа нь цаашид тойрог замд пуужин хөөргөхөд аюул учруулж болзошгүй гэж үзсэн байна. Энэтхэг нь гуравдугаар сарын 27-нд хиймэл дагуулын эсрэг шинэ зэвсэг туршсан юм. Тус туршилтын үеэр болзошгүй дайсны хиймэл дагуулыг илрүүлэн устгах "A-Sat" гэж нэрлэгдсэн технологийг шалган 740 кг жинтэй "DRDO Microsat-R" хиймэл дагуулыг тусгай пуужингаар харван устгаж байсан. NASA-ийн мэргэжилтнүүд энэ талаар "Пуужин оносны дараа хиймэл дагуулын 400 гаруй хэлтэрхий үссэн. Зургаадугаар сарын 15-ны байдлаар 49 хэлтэрхий нь тойрог замд хэвээр байсан" гэж бичжээ. Энэтхэгийн пуужингийн технологийн мэргэжилтэн Рави Гупта нь NASA-ийн энэхүү мэдэгдлийг эрс шүүмжилсэн байна. Тэрээр энэхүү мэдээллийг Энэтхэгийн эсрэг чигэлсэн буруутган зэмлэх суртал ухуулгатай төстэй байна гээд "NASA яагаад АНУ, ОХУ, БНХАУ-ын үүсгэж байгаа сансрын хог хаягдлын талаар ярихгүй байгаа юм бэ? Эдгээр улс нь туршилт хийхдээ маш олон тооны хог бий болгосон. Манай үүсгэсэн гээд байгаа хэлтэрхий нь ойролцоогоор 100 км-ийн өндөр байх тул сансрын ямар ч хөлөгийн хувьд аюулгүй юм" гэсэн байна.