​ЕВРОПЫН САНСРЫН АГЕНТЛАГ ОРОСЫН СОЮЗ-ААС ТАТГАЛЗЛАА

Европын сансрын агентлагийн ОХУ дахь төлөөлөгчийн газрын тэргүүн Рене Пишель нь цаашдаа Европын сансрын нисгэгчдийг Олон улсын сансрын станц руу хүргэхдээ Оросын "Союз" хөлгийг ашиглахгүй гэдгийг албан ёсоор мэдэгджээ. Тэрээр Евразийн агаар ба сансрын орон зайн конгресст оролцохдоо энэ талаар ТАСС агентлагт мэдээлсэн байна. Тэрээр "Зургаадугаар сард Олон улсын сансрын станц дээр очсон Италийн Лука Пармитано нь Оросын "Союз"-ыг ашигласан сүүлийн европ сансрын нисгэгч байсан. Ойрын жилүүдэд манай сансрын нисгэгчид Америкийн сансрын хөлгүүдээр нисэх болно" гэжээ. Оросын тал европчуудын энэ байр суурийг Америкаас үзүүлж байгаа хүчтэй дарамт шахалтаар тайлбарласан байна. Оросын сансрын нисгэгч Павел Виноградов нь "Тэд манай хоёрын хамтын ажиллагааг үгүй хийхийн тулд шаардлагатай бүхнийг хийсэн. Европын сансрын агентлаг татгалзлаа гээд манайд алдах юмгүй. "Союз"-ыг урьдын адил ашигласаар байх болно. Жишээлэхэд, энэ есдүгээр сард бид Саудын Аравийн сансрын нисгэгчийг хөөргөх гэж байна" гэжээ.