​АНУ-ЫГ ЗЭВСЭГЛЭЛЭЭР ХӨӨЦӨЛДӨХГҮЙ БАЙХЫГ УРИАЛАВ

Хятадын Гадаад харилцааны яамны төлөөлөгч Гэн Шуган нь АНУ-д хандан хүйтэн дайны үеийн сэтгэлгээнээс салж, зэвсэглэлийг хязгаарлах тухай олон улсын хэлэлцээрийг хадгалахад илүүтэй анхаарахыг уриалсан байна. Америк нь Дунд ба ойрын тусгалтай пуужинг хязгаарлах тухай гэрээнээс гараад ердөө гурван долоо хоног болсны дараа дундын зайн тусгалтай пуужин харван туршилт хийсний дараа энэ мэдэгдлийг хийжээ.

Энэхүү туршилт нь Америкийн пуужинг хязгаарлах тухай гэрээнээс гарахаар эртнээс төлөвлөж байсныг харуулж байна гэж БНХАУ үзэж байгаа аж. Цаашид энэ хэлбэрээр үргэлжилбэл дэлхийн хэмжээнд зэвсэглэлээр хөөцөлдөх нь нэмэгдэж, олон улсын болон бүс нутгийн аюулгүй байдалд ноцтой аюул заналхийлэхийг Хятадын тал анхааруулсан байна.

Америкчуудын далавчит пуужин харваж туршихдаа ашигласан пуужингийн суурь нь Румын, Польшид байрлуулах гэж байгаа Пуужингийн довтолгооноос хамгаалах системийн амдан устгагч пуужин харвахад ашигладаг суурь юм. Энэ бол цаашдаа энэ суурийг Оросын эсрэг довтлоход ашиглах боломжтойг харуулсан хэрэг. Иймд Оросуууд ойрын үед энэхүү туршилтын хариуг өгнө гэж мэдэгдээд байгаа юм.