​АВСТРИЙН ЗЭВСЭГТ ХҮЧИН ТӨЛБӨРИЙН ЧАДВАРГҮЙ БОЛНО

Австрийн зэвсэгт хүчин нэн чухал ач холбогдолтой дэд бүтцүүдээ хамгаалах чадваргүй болтол суларсан тухай тус улсын Батлан хамгаалахын сайд Томас Штарлингер "Presse" сонинд ярьсан байна. Сайдын хэлж байгаагаар жил хагасын дараа гэхэд Австрийн арми төсөв нь хүрэлцэхгүйгээс төлбөрийн чадваргүй болох тул "2021 оны нэгдүгээр сарын 1-нд энэ бүхэн ойлгомжтой болно" гэж хэлжээ. Одоо байгаа байдлаар дайн тулааны үед нэн тэргүүнд хамгаалах ёстой 256 объектоос зөвхөн ганцыг л зохих ёсоор хамгаалж чадах боломжтой байгаа аж. Ингээд зогсохгүй кибер дайралт, цахилгаан тасарвал арми яаж ч чадахгүйг онцлоод "Хэрэв хэн нэгэн нь Австрийн дээгүүр хууль бусаар нисэхийг хүсвэл харанхуй болтол хүлээдэг. Учир нь агаарын орон зайг бараг ажигладаггүй гэдгийг тэд мэддэг" гэжээ.Сүүлийн үед өрнөдийн хэвлэлүүд Оросын аюул гэгчээс хамгаалахын тулд арми, зэвсэгт хүчнээ бэхжүүлэх, Батлан хамгаалах салбартаа илүү их мөнгө зарцуулах шаардлагатай талаар их ярих болсны нэг жишээ нь энэ юм.