​ИРАН, ХОЙД СОЛОНГОС ХОЁР БАЛЛИСТИК ПУУЖИНГ ХАРВАЖ ТУРШЛАА

Өнгөрөгч баасан гарагт Иран нь өөрийн үйлдвэрлэсэн шинэ төрлийн баллистик пуужин харваж туршсан тухай тус улсын Лалын хувьсгалыг хамгаалагч хүчний командлагч бригадын генерал Хосейн Салами мэдэгдсэн байна.

Тэрээр "Манай улс ямагт хамгаалах болон стратегийн систем туршсаар ирсэн бөгөөд энэ бол хүчин чадлаа нэмэгдүүлэх эцэс төгсгөлгүй зам юм. Өчигдөр Ираны ард түмний хувьд хамгийн амжилттай өдрүүдийн нэг байлаа" гэсэн байна. Гэхдээ ямар зориулалттай, хэдийн алслалттай пуужин туршсан тухай нарийн мэдээллийг өгүүлсэнгүй. Иран нь сүүлийн жилүүдэд баллистик пуужингийн үйлдвэрлэлд үсрэнгүй амжилт гаргасан. Жишээлбэл, 2015 онд 2000 км-ийн алсын тусгалтай "Мескат" далавчит пуужин туршин зэвсэглэлдээ авсан байна. Энэ зуур Хойд Солонгос ч зүгээр суусангүй ээлжит удаагаа ойрын зайн тусгалтай пуужин харван туршжээ. Энэ бол Хойд Солонгосоос энэ сард пуужин харван туршсан долоо дахь тохиолдолд юм. Харвасан пуужин нь 400 мм-ийнтом калибртай олноор харвах системийнх байж. Туршсан пуужин нь 380 км нисч Япон тэнгист унажээ.