​ЛИВАН НҮБ-Д ГОМДОЛ МЭДҮҮЛНЭ

Сүүлийн үед Израйлийн цэргийн нисэх хүчний онгоцнууд агаарын хилийг нь удаа дараалан зөрчиж байгаа тул Ливаны Засгийн газар НҮБ-д хандан гомдол мэдүүлэхээр болсон гэдгийг тус улсын Гадаад харилцааны сайд Жебран Басиль мэдэгджээ. Ням гарагт Израйлийн хоёр дрон Бейрутын ойролцоох агаарын хилийг нэвтрэн орсон байна. "Аль Ватания" агентлагийн мэдээлснээр шөнийн цагаар орж ирсэн хоёр дроны нэг нь осолдож унасан бол нөгөөх нь агаарт дэлбэрсэн. Ливаны армийн эргүүлүүд дрон унасан газрыг бүсэлж, мөрдөн шалгах ажиллагаа явуулж байна гэсэн. Харин лалын шашны "Хеболла" хөдөлгөөн нь энэ талаар мэдээлэл хийхдээ Израйлийн хоёр дрон нь тэсрэх бөмбөгөөр цэнэглэгдсэн байсан, нэг нь тус хөдөлгөөний мэдээллийн төв дээр унаж дэлбэрсэн гэжээ. Тус хөдөлгөөний төлөөлөгч нь "Хүчтэй дэлбэрэлт болж их хэмжээний эд зүйлийн хохирол учирсан. Төвд ажиллаж байсан гурван ажилтан шархадсан" гэсэн байна. Энэ хэрэгтэй холбоотойгоор Ливаны Ерөнхий сайд Саад Харири "Израйлийн цэргийн нисэх хүчин Бейрутын тэнгэрт нислэг үйлдэж ээлжит удаагийн түрэмгийлэл үйлдсэн нь бүс нутгийн тогтвортой байдалд ноцтой аюул учруулж байгаа хэрэг. Манай Засгийн газар Ливан улсыг үндэсний аюулгүй байдалд нь заналхийлсэн дайсагнасан төлөвлөгөөнд татагдан орохоос хамгаалах шаардлагатай бүх арга хэмжээг авна" гэжээ.