​ХОЛЛИВУДЫН ОДУУД АМАЗОНЫ ШИРЭНГЭН ОЙН ТҮЙМРИЙГ УНТРААХЫГ УРИАЛЖ БАЙНА

Холливудын одууд Амазоны ширэнгэн ойд дэгдээд байгаа түймрийг унтраахыг уриалжээ. Тухайлбал, Анжелина Жоли түймрийн унтраах арга хэмжээ нэн даруй авахыг уриалсан байна. Тэрээр "Амазоны халуун орны ойг түймэр устгаж байгааг хараад суух тун хэцүү байна. Энэ ой дэлхийн хувьд ямар чухал болохыг ээж минь намайг зургаатай байхад ярьж өгч байсныг би санадаг. Ойг хамгаалж, нандигнах ёстой юм. Гэтэл бид тэгэж чадсангүй" гэжээ.

Бразилын эрх баригчид түймрийг унтраах дорвитой арга хэмжээ авахгүй байгаа тухай бусад алдартнууд ч мэдэгдэл хийсэн байна. Жүжигчин Леонардо ди Каприо, хөлбөмбөгчин Рональдо нар энэхүү түймрийг унтраах нь дэлхийн бүх улс оронд хамаатай болохыг онолцжээ. Учир нь, Амазоны ширэнгэн ой нь дэлхийн агаар мандал дахь хүчилтөрөгчийн 20 хувийг дангаар ялгаруулж байдаг, дэлхийн уушиг гэж нэрлэгдсэн нутаг. Энэ зуур түймрийн утаа Аргентинд хүрсэн тухай тус улсын цаг агаарын албанаас мэдээлсэн байна. Түймрийн утаа нь Болив, Парагвай болон Бразилын өмнөд хэсэгт түймэрт автаад байгаа газруудаас иржээ. Утаа нь Бразилын хилээс 1000 км-ийн алсад байдаг Аргентины нийслэл Буэнос-Айрэст хүрсэн байна.

Түймэр нь ойрын үед Аргентины цаг агаарт нөлөөлж магадгүй гэдгийг мэргэжилтнүүд анхааруулжээ. Учир нь, асар их талбайд ой устан үгүй болсноор агаар мандалд хадгалагдан үлдэх чийгийн хэмжээ буурч эхлэх нь удалгүй хур тунадасны хэмжээ буурахад хүргэнэ.Аргентин нь газар тариалан, мал аж ахуйн улс тул хур тунадасны хэмжээнд тун мэдрэг.