​ХУСИТ БОСОГЧИД ГАР ХИЙЦИЙН ПУУЖИНГААР АМЕРИКИЙН ДРОНЫГ СӨНӨӨЖЭЭ

Йемений хусит босогчид өөрсдийн бүтээж, угсарсан гар хийцийн пуужингаар Америкийн "MQ-9" дроныг устгасан тухайгаа мэдэгдсэнийг "Reuters" агентлаг уламжилсан байна. Хусит босогчдын төлөөлөгч Яхья Сария нь Twitter хуудсаараа "Манай тэнгэрт урьдынхтай адил дураараа дургиж чадахгүй боллоо. Ойрын үед бүгдэд гэнэтийн бэлэг барих болно. Түүнийг оносон пуужин бол манай өөрсдийн бүтээсэн эд бөгөөд удахгүй хэвлэлийн бага хурал дээр харуулна" гэж жиргэжээ. Йемений хусит босогчдын эсрэг байлдааны ажиллагаа явуулаад удаж байгаа Саудын Арави нь Ираныг босогчдод онгоц сөнөөгч болон баллистик пуужин нийлүүлдэг гэж буруутгадаг. Наймдугаар сарын 20-нд Йемений Дхамар мужид Америкийн "MQ-9" дроныг хуситууд буудаж унагасан тухай мэдээ ирж байсан ч ямар зэвсэг ашигласан, үнэхээр сөнөөсөн эсэх нь тодорхойгүй байсан юм.