​ОРОСЫГ ИХ ДОЛООГИЙН УУЛЗАЛТАД УРЬЖ МАГАДГҮЙ

АНУ-ын Ерөнхийлөгч Трамп Оросын "Их долоо"-ийн чуулга уулзалтад буцаан дуудах тухай Францын Ерөнхийлөгч Макроны саналыг зөвшөөрсөн тухай "CNN" агентлаг мэдээлсэн байна. Цагаан ордон дахь эх сурвалж тус агентлагт ярихдаа Трамп Макрон хоёр наймдугаар сарын 20-нд утсаар ярилцахдаа, дараа жил АНУ-д болох "Их долоо"-ийн уулзалтад Оросыг байлгахыг хэрэгтэй гэдэг дээр санал нийлсэн гэжээ. Трамп нь хэдхэн хоногийн дараа Францын Биаррицт болох их гүрнүүдийн уулзалтаар бусад орны төрийн тэргүүнүүдтэй ярилцахдаа энэ сэдвийг хөндөх аж. Бусад таван орны удирдагч энэ талаар ямар байр суурь баримтлах нь тодорхойгүй. Трамп энэ талаар ярихдаа "Их долоогийн уулзалтаар яригддаг олон сэдэв Оростой холбоотой" гээд удирдагч нарын уулзалтад оролцох нь зүйн хэрэг гэсэн. ОХУ-ын Ерөнхийлөгч Путин энэ талаар тайлбарлахдаа "Долоогийн, наймын уулзалтад Оросыг буцааж авах тухайд гэвэл бид тэндээс ер нь гараа ч үгүй. Болно гэвэл сайн хэрэг, бүгдтэй нь Москвад уулзахад таатай байх болно" гэжээ. Энэ мэдээг өрнөдийн зарим судлаач Украйны хувьд том ялагдал байх болно гэж тайлбарлаж байна.