​ОРОСЫН НОРИЛЬСК ХОТЫН АГААРЫН БОХИРДОЛ ДЭЛХИЙД НЭГД ОРЖ БАЙНА

Байгаль хамгаалах чиглэлээр идэвхтэй үйл ажиллагаа явуулдаг "Гринпис" байгууллагын Энэтхэг дэх салбар нь дэлхий хэмжээнд SO2 хүхрийн давхар исэл гэсэн хортой хийг агаар мандалд хамгийн ихээр ялгаруулж байгаа газруудыг тодруулах судалгаа явуулжээ. Сансрын уудмыг судлах Америкийн агентлагийн хиймэл дагуулуудыг ашиглан явуулсан тус судалгааны үеэр хүхрийн давхар ислийг хамгийн ихээр ялгаруулдаг хот нь ОХУ-ын Норильск болохыг тогтоожээ. Норильск хотод никель хайлуулах олон том үйлдвэрүүд байдаг нь хорт хийн гол эх үүсвэр болдог аж. Энэ хотын зөвхөн агаар мандал гэлтгүй орчин тойрных нь байгаль бүхэлдээ бохирдоод байгаа. Иймдээ ч энэ хотыг Дэлхийн хамгийн их бохирдсон арван газрын нэг гэж зарлаж байсан юм. Хүхрийн давхар ислийн ялгарлаар хоёрдугаарт орсон газар нь Өмнөд Африкийн Мпумаланге муж дахь Криэль ба Хайфелд дүүргүүд. Эдгээр дүүрэгт Өмнөд Африкийн "Eskom" компани нь нүүрсээр ажилладаг 12 цахилгаан станц ажиллуулдаг. Эдгээр станц нь бүс газрыг агаарын гол бохирдуулагч. Гуравдугаарт нь Ираны Заргоза дахь газрын тос боловсруулах ба химийн үйлдвэр орчмын нутаг орсон. Газрын тос боловсруулах энэхүү нүсэр том үйлдвэр нь орчноо бохирдуулаад олон жил болж байгаа. Гринписээс гаргасан судалгаагаар агаар мандалд хүхрийн давхар исэл ялгаруулагч гол эх үүсвэрүүд нь газрын тос боловсруулах үйлдвэр, төмөр хайлуулах үйлдвэр, нүүрсээр ажилладаг цахилгаан станцууд аж.