ТУРКИЙН АРМИ СИРИЙН НУТАГТ ЦӨМРӨН ОРЛОО

Сирийн Засгийн газрын арми Идлиб мужийг алан хядагчдаас чөлөөлөх ажиллагааг тун эрчимтэй явуулж байна. Өчигдөр Сирийн нийслэлийг Дамаскийг эдийн засгийн төв болох Алеппо хоттой холбодог стратегийн чухал ач холбогдолтой зам дагуу байрласан Хан Шейхун хотыг алан хядагч "Жебхат ан Нусра" бүлэглэлээс чөлөөлсөн тухай "Syria TV" мэдээлсэн байна.Гэвч энэ байдал Туркийн удирдлагад таалагдаагүй бололтой. Туркийн эрх баригчид хүнд байдалд орсон алан хядагчдад зэвсэг, сум хүргэх зориулалттай хуягт тээвэрлэгчээр хамгаалуулсан ачааны машины цуваа явуулсан байна. Энэ үйлдлийг Сирийн Засгийн газар эрс буруушааж "Зэвсэгт этгээдүүдэд зориулсан сум, зэвсэг бүхий Туркийн цэргийн цуваа Идлиб муж руу нэвтрэн орсныг манай газар нутгийн халдашгүй байдлыг зөрчсөн хэрэг" гэж мэдэгдэв. Үүний дараа алан хядагчдад сум, зэвсэг хүргүүлэхгүй байх бүх арга хэмжээг авна гэжээ.Энэ мэдэгдлийн дараахан Сирийн байлдааны онгоцнууд Туркийн цэргийн цувааг бөмбөгдсөн мэдээлэл ирсэн, харин тус цуваанаас хүлээсэн хохирлын тухай мэдээлэл хараахан ирээгүй байна. Одоогоор Сирийн арми нь эзэлсэн Хан Шейхун хотын баруун хэсэг дэх фермүүдийг эзлэн алан хядагчдыг сум, зэвсгийн хангалтаас нь таслан байлдааны ажиллагаа явуулж байгаа аж.Сирийн онгоцнууд Туркийн цувааг бөмбөгдсөн явдалд Эрдоган яав ч дуугүй суухгүй. Ингэснээр тус бүс нутаг Сирийн арми, алан хядагчид ба Сирийн зэвсэгт сөрөг хүчнийхнээс гадна Туркийн зэвсэгт хүчний ангиуд орж ирснээр байдал улам ээдрээтэй болж магадгүй болжээ.