МОСКВАД 226 ЗОРЧИГЧТОЙ ОНГОЦ ЭРДЭНЭ ШИШИЙН ТАЛБАЙД ОСЛЫН БУУЛТ ХИЙВ

Наймдугаар сарын 15-нд Москва-Симферополь чиглэлийн нислэг үйлдэж байсан "Airbus A321" онгоц осолдож нисэх буудлын ойролцоох эрдэнэ шишийн ослын буулт хийсэн тухай "Вести" суваг мэдээлж байна. Онгоц хөөрөх үедээ сүрэг шувуутай таарсны улмаас хоёр хөдөлгүүрт нь олон шувуу орж гэмтжээ. Үүнээс болж өндөр авч чадахгүй байхад ослын буулт хийхээс өөр аргагүй болжээ. Ийм нөхцөлд онгоцны экипажийн дарга нь ослын буулт хийхдээ дугуйг гаргалгүй, онгоцыг элгээр нь газардуулахаар шийдсэн нь тун оновчтой шийдвэр болсон байна. Онгоцыг газардахад эрдэнэ шиш нь зөөлөвчийн үүрэг гүйцэтгэсэн болохоор нэг зорчигчийн гар хугарсан бусад зорчигчид жижиг гэмтэл авсныг эс тооцвол бүгд эсэн мэнд гарсан байна.

Эгзэгтэй үед оновчтой шийдвэр гарган зорчигчдын амийг аварсан багийн гишүүдийг Оросын Засгийн газар өндрөөр үнэлж, экипажийн дарга Дамир Юсуповыг ойрын хугацаанд төрийн одонгоор шагнана гэжээ.Оросын төдийгүй Өрнөдийн дийлэнх хэвлэл, сайтууд энэ буултыг Нью-Йоркийн Гудзон мөрөнд гэмтэл авсан онгоц газардуулсан үйл явдалтай зүйрлэж, экипажийн даргыг баатар гэж нэрлэн, 226 зорчигч амьд мэнд үлдсэнд баярлажээ.

Гэтэл Украйнд ослын буултын үеэр экипажийн ур чадварын ачаар амьд гарсан хүмүүсийг "Бүгд согтуу тул цангаад ус уухаарбуусан", "Шувууд хүртэл Украйныг дэмжиж байна", "Хайран шувуу" гэх мэтээр тавлан доромжилсон нь олон хүнийг гайхшруулжээ. Ингээд зогсохгүй Украйны заналт дайсан гэгдсэн хүмүүсийн нэр, гэрийн хаяг зэрэг хувийн мэдээллийг нь олон нийтэд ил болгон, хожим нь шийтгэнэ гэж сүрдүүлдэг "Миртворец" сайтад экипажийн бүх гишүүдийн нэр, хаягийг оруулсан байна. Тэднийг Крымийн хойг руу Украйны Засгийн газрын зөвшөөрөлгүй нислэг үйлдэж, хүмүүсийг хууль бусаар удаа дараалан тээвэрлэсэн гэж буруутгажээ.