Б.БАТ-ЭРДЭНЭ: БИ Э.ОЮУНБОЛДЫГ АРХИ УУЧИХ ВИЙ Л ГЭЖ САНАА ЗОВДОГ, ХАРИН ДОПИНГ ХЭРЭГЛЭСЭН ГЭЖ БОДОХГҮЙ БАЙНА

Улсын баяр наадамд аварга болсон Э.Оюунболдыг допингийн шинжилгээнд бүдэрсэн талаар МҮБХ-ноос мэдээлсэн. Улсын аварга Э.Оюунболдыг багш Б.Бат-эрдэнэ аваргатай хамт БНСУ-д цус цэвэршүүлэх эмчилгээнд орж байгаа талаар зарим хэвлэлүүд мэдээлж байгаа юм. Тэгвэл энэ асуудалтай холбоотой Б.Бат-Эрдэнэ аваргатай утсаар холбогдож мэдээлэл авлаа.

Энэ жилийн наадмын түрүү Э.Оюунболдоос сэргээш илэрсэн гэх мэдээллийг МҮБХ-ноос хийлээ. Э.Оюунболд аварга өөрөө мэдэгдэл хийхгүй байгаад байна. Энэ ямар учиртай юм бэ?

-Миний бие өвдөөд дотрын асуудалтай байна. Маргааш би хот руу орохыг бодоод байна.

Э.Оюунболд аварга допинг хэрэглэсэн нь үнэн юм уу?

-Би мэдэхгүй,наад нөхрийг чинь гайхаад л бодоод сууж байна. Жишээлбэл наадах чинь зургаа давж байхдаа ч допингийн шинжилгээнд орж л байсан.Допингийн шинжилгээг 2001,2002 оноос хойш авсан биздээ. Үндэсний их баяр наадамд Э.Оюунболд яах учраа олдоггүй тийм хүн биш. Бид бүгд мэднэ шүү дээ. Допинг хэрэглэсэн гэхээр миний санаанд ер багтахгүй байгаа. Наад нөхрийг чинь архи зохиод байна л гэдэг. Өдөр бүр ажилтай хүн чинь уулзах биш, утсаар л холбоотой байдаг. Архи дарс ууж байгаа юм биш биз гэх мэтчилэнгээр ярьдаг. Намайг хүмүүс утсаа салгаад алга болчихлоо гээд л байгаа. Би хөдөө сүлжээ барихгүй газар хэд хонолоо шүү дээ.

Та Э.Оюунболд аваргатай уулзсан уу?

-Бид хоёр Хэнтий аймгийн Өмнөдэлгэрт Жонан Ханчэн гэгээнтэнг залрахад уулзсан.

Та хоёрыг уулзах үед допингийн шинжилгээний хариу гарчихсан байсан шүү дээ? Шинжилгээний хариуны талаар юу гэж хэлсэн юм бэ?

-Тухайн үед наад асуудал чинь ерөөсөө яригдаагүй. Наад асуудлын чинь талаар Э.Оюунболдтой ерөөсөө хөндөж ярьж байгаагүй.

Одоо Э.Оюунболд аварга хаана байгаа вэ?

-Мэдэхгүй, таг алга байна. Би тэр наадмаас хойш ямар сайндаа санаа зовоод чи хаана байна? архи зохиод яваад байна уу гэж хааяа мессежээр асуудаг. Өөр зүйл байхгүй. Хуучин бол МҮБХ-ны тэргүүн, бөхийн салбар комисс мэддэг байсан бол сүүлийн хоёр жил МҮБХ шүүхэд маргаантай байгаа учраас ерөөсөө хүн орохгүй байгаа шүү дээ.

Та шавьдаа итгэж байна уу?

-Тал бүрээс нь бодож үзэхэд би наад нөхрийг чинь архи зохиод явчих вий л гэж их санаа зовдог. Өөр зүйлд огт санаа зовдоггүй шүү дээ.

Уучлаарай, ийм мэдээлэл гарсанд та харамсаж байна уу?

-Харамсалтай байлгүй яахав дээ.Ямар учиртай юу болоод байдаг юм. Жил болгон л ийм асуудлууд гарах юм. Ямар улсууд оролцоод юу болгоод байдаг юм. Мэдэхгүй байна.

Та Хэнтий аймагт байгаа юм уу?

-Тийм ээ, Би Хэнтий аймагт байна. Манай Өмнөдэлгэрт буурал ээжийн ууж байсан рашаан байдаг юм.

Сэргээшийн асуудал гарснаас хойш та Э.Оюунболд аваргатай холбоо бариагүй юм байна, тийм үү?

-Бариагүй, Өмнөдэлгэрт нэг үйл ажиллагаанд оролцоод л таг чиг байна.

Та өөрийнхөө твиттер хуудсанд Өмнөдэлгэрт хамт байна гэж жиргэсэн байсан шүү дээ.Тэгэхэд аваргын сэтгэл санаа ямархуу байсан бэ?

-Өө мэдэхгүй, бид хоёр чинь хийдэд хамт байсан. Түрүүний хэлсэнчлэн би архи уучих вий л гэж санаа зовдог. Тэрнээс биш допинг хэрэглэсэн гэж бодохгүй байна.

Та шинжилгээний хариуг эцсийн байдлаар гартал хүлээж байя гэсэн байр суурьтай байгаа юм байна, тийм үү?

Одоо тэгээд ном журмынх нь дагуу юу болдог юм. Баяр наадмын тавын даваа эхэлсэн хойно наадамд очдог. Энэ жил долоогийн даваа эхэлж байхад би очсон шүү дээ.

За, та сайхан амраад ирээрэй.Баярлалаа

-Баярлалаа