ПОЛЬШ НЬ ОРОСЫН СУРТАЛ УХУУЛГАТАЙ ХИЙХ ТЭМЦЛЭЭ НЭМЭГДҮҮЛЭХИЙГ УРИАЛАВ

Польшийн олон улсын харилцааны төв нь Европын холбоог Оросын хэвлэл мэдээллийн хэрэгслүүдийн тарааж байгаа суртал ухуулга, хуурамч мэдээлэлтэй хийх тэмцлээ нэмэгдүүлэхийг уриалсан тухай "RT" суваг мэдээлж байна.

Энэхүү төв нь Польшийн Батлах хамгаалах ба Гадаад харилцааны яамдтай хамтран ажилладаг бөгөөд Польшийн төсвөөс санхүүждэг юм байна. Тус төвөөс саяхан тусгай мэдэгдэл гарган ОХУ-ыг Европын холбооны дотоод хэрэг хөндлөнгөөс нөлөөлөхийг оролдож байна гэж буруутгажээ. Ийм оролцооны жишээ болгож, саяхан болж өнгөрсөн Европын холбооны парламентын сонгуулийг дурдсан байна. Улмаар цаашид Москвагийн зүгээс хуурамч мэдээлэл цацахтай хийх тэмцлээ хүчлэхийг уриалжээ.

Европын холбоо нь Оросын тарааж байгаа хуурамч мэдээлэлтэй тэмцэх зорилго бүхий Стратегийн харилцаа холбооны оператив ажлын бүлэг буюу StratCom гэсэн байгууллагыг бий болгосон. Тус байгууллагад Европын гадаад харилцааны албаны ажилтнууд, Оросыг судлагч шинжээч нар ордог. Энэхүү байгууллага нь Оросын мэдээллийн хэрэгслүүдээр цацагдаж байгаа мэдээлэлд мониторинг хийж, хуурамч мэдээлэл, суртал ухуулгыг илрүүлэн сэтгүүлчдэд зориулсан сургалт, форум явуулдаг.

StratCom-ын салбарууд Европын холбооны зарим улсын Гадаад харилцааны яаманд ажиллаж байдаг. Харин Польшийн олон улсын харилцааны төв нь Оросын суртал ухуулгатай тэмцэхэд энэ бүхэн хангалтгүй гэж үзээд StratCom-ын бүх салбаруудыг НАТО-ийн Стратегийн харилцаа холбооны төвтэй илүү нягт хамтран ажиллаж, Оростой холбоотой үйл ажиллагаа явуулдаг төрийн бус байгууллагуудын ажиллагааг санхүүгээр илүүтэй дэмжихийг уриалсан байна.