ХҮҮХЭД ХҮЧИРХИЙЛСЭН ХЭРЭГТ СЭЖИГЛЭГДСЭН АМЕРИК ТЭРБУМТНЫ ҮХЭЛД ОРОСЫГ БУРУУТГАЖ БАЙНА

Америкт өсвөр насны хүүхдүүдийг албадан биеийг нь үнэлүүлсэн, хүчирхийлсэн хэрэг сэжиглэгдэн шоронд хоригдож байсан тэрбумтан Эпштейн амиа егүүтгэсэн хэрэг ихээхэн дуулиан тариад байна. Эпштейн нь худалдан авсан арал дээрээ өсвөр насны охидыг авчран ёс бусаар зугаацахад нь Клинтон, Трамп оролцсон байж магадгүй тухай мэдээ гарсны дараагаар энэ хэрэг америкчуудын анхаарлын төвд ороод байсан юм. Улмаар хэргийг мөрдөн байцаах явцад дээрх хоёроос гадна нөлөө бүхий бусад олон улстөрчийн нэр гарна гэж таамаглал явж байсан.

Наймдугаар сарын 3-нд Эпштейнийг шоронгийн өрөөнд амиа хорлосон байдалтай хэвтэж байхыг нь илрүүлсэн нь бүр ч их дуулиан тариад байна. Учир нь, энэ хүн долоодугаар сарын 23-нд шоронд хоригдож байхдаа амиа хорлох үйлдэл хийгээд бүтэлгүйтэж байсан аж. Үүний дараагаар түүнийг өндөржүүлсэн хараа хяналтад байлгах, өрөөг нь 30 минут тутам шалгаж байх тушаалыг шүүхээс өгсөн байна. Гэтэл шоронгийн удирдлага хамт хоригдож байсан сэжигтнийг нь өөр өрөө рүү шилжүүлээд Эпштейнийг олон цагийн турш анхаарал, хяналтгүй орхисон байсан нь илэрсэн тул түүний үхлийн талаарх янз бүрийн цуу яриа, хуйвалдааны онол гарахад хүргээд байна.

Америкдаа нэр алдартай хүмүүс энэ хэрэгт Оросын тусгай албадыг буруутгаад эхэлж. Тэр хүмүүс оросууд сонгуульд нөлөөлж хуйвалдаанаар Трампыг Ерөнхийлөгч болгосон хүүхэд хүчирхийлсэн хэрэгт холбогдож магадгүй болохоор нь гэрчийг шоронд устгасан гэж мэдэгдэж байна. Жишээлбэл, Америктаа алдартай "Өглөөний мэнд, Жо" шоуны хөтлөгч Жо Скарборо "Баян бас нөлөөтэй хүмүүсийн амьдралыг бусниулж магадгүй мэдээлэлтэй хүн шоронгийн өрөөнд үхсэн байдаг. Дэндүү ойлгомжтой бас... дэндүү орос маягийн юм боллоо" гэж Twitter хуудсаараа жиргэжээ. Жүжигчин Алек Болдуин бол шууд "Оросууд энд бүгдийг захирч байгаа болохоор тэд л Эпштейнийг алсан" гэж мэдэгдсэн байна.

Гол сэжигтэн нь нас барсан хэдий ч энэ хэргийг сайтар шалгаж Эпштейний үхэлтэй холбоотой бүгдийг тодруулна гэдгээ АНУ-ын Ерөнхий прокурорын албанаас мэдэгдсэн байна.