ХОНКОНГИЙН СӨРӨГ ХҮЧИН ИРЭХ НЯМ ГАРАГТ ХОТЫН ТӨВД ЖАГСААЛ ЯВУУЛАХАА ЗАРЛАЖЭЭ

Хонконгийн сөрөг хүчнийхэн ирэх ням гарагт хотын төв хэсэгт олон зуун мянган хүн оролцсон эсэргүүцлийн жагсаал явуулахаар болсноо албан ёсоор зарлажээ. Жагсаалыг зохион байгуулж буй "Хүний эрхийн төлөөх иргэний фронт" нэртэй ардчилсан үзэлтэй байгууллагаас арга хэмжээнд нь ойролцоогоор 300 мянган хүн оролцоно гэж тооцоод байгаагаа мэдэгдсэнийг "RTHK" радио станц уламжилжээ.

Жагсаалыг орон нутгийн цагаар 15 цагт Виктория цэцэрлэгт хүрээлэнгээс эхлээд ажил хэргийн төв болсон хэсэгт дуусгах төлөвлөгөөтэй байгаа аж. Жагсаал явуулах хүсэлтийг эрх баригчдад хүргэсэн ч хараахан шийдвэр өгөөгүй байгаа аж. Гэхдээ эсэргүүцэгчид ийм зөвшөөрөл авсан аваагүй жагсаал хийх бололтой. Учир нь, өнгөрөгч ням гарагт Хонконгийн эрх баригчид аюулгүй байдлыг хангах гэсэн шалтаг заан хотын дөрвөн дүүрэгт жагсаал явуулах хүсэлтэд татгалзсан хариу өгсөн ч эсэргүүцэгчид жагсаал явуулсан. Энэ жагсаалын үеэр жагсагчид ба цагдаа нарын хооронд мөргөлдөөн болж 40 орчим хүн гэмтэж бэртсэн.

Энэ зуур Хонконгийн нисэх буудалд эсэргүүцлийн жагсаал хоёр дахь өдрөө тасралтгүй үргэлжилж байна. Нисэх буудлын удирдлага нь даваа гарагт цуцлаад байсан нислэгүүдийг мягмар гараг гэхэд сэргээнэ гэж тооцолж байсан нь талаар болжээ. Үүнээс болоод мягмар гарагт 300 гаруй нислэгийг хойшлуулсан байна.